“TASHKENT CYBERLEX–2026” халқаро илмий-амалий форуми доирасида ташкил этилган иккинчи параллел сессия рақамли криминалистиканинг замонавий усул ва воситалари ҳамда кибержиноятчиликка қарши курашнинг долзарб масалаларига бағишланди.
“e-Crime: рақамли криминалистиканинг замонавий усуллари ва воситалари” мавзусида ўтказилган сессия рақамли муҳитда содир этилаётган жиноятларни фош этиш, рақамли далиллар билан ишлаш ва халқаро ҳуқуқий ҳамкорликнинг замонавий механизмларини муҳокама қилишга қаратилган нуфузли эксперт мулоқот майдонига айланди.
Сессия ишида INTERPOL, Европада хавфсизлик ва ҳамкорлик ташкилоти, БМТнинг Кибержиноятчиликка қарши минтақавий маркази, Европа кибертаълим ва таълим тармоғи (ECTEG), Корея Республикаси, Нидерландия, Молдова, Қозоғистон ҳамда Ўзбекистоннинг ҳуқуқни муҳофаза қилиш ва суд-эксперт муассасалари вакиллари иштирок этди.
Муҳокамалар марказида рақамли криминалистиканинг институционал асослари, Даркнет муҳитида рақамли изларни сунъий интеллект ёрдамида таҳлил қилиш, технологик ўғирликлар ва молиявий жиноятларни фош этиш, электрон ўқув платформалари орқали кибертерговчиларни тайёрлаш, INTERPOL билдиришномалари ва циркулярларининг кибержиноятларни очиш амалиётидаги ўрни, шунингдек ҳуқуқни муҳофаза қилиш тизимида янги технологиялардан фойдаланишнинг сиёсий ва ҳуқуқий оқибатлари каби масалаларга алоҳида эътибор қаратилди.
Экспретлар таъкидлаганидек, рақамли криминалистика бугун жиноятларни фош этишнинг алоҳида инструменти эмас, балки ҳуқуқни муҳофаза қилиш тизими трансформациясининг муҳим йўналишларидан бирига айланмоқда.
Сессия доирасида Корея Республикаси Миллий полиция агентлиги ҳузуридаги Рақамли криминалистика ассоциацияси директори Сун Ки Бом, INTERPOL Ижроия дирекциясининг ҳуқуқий масалалар бўйича мутахассислари Умит Сейтжан ва Мурад Байрамли, ЕХҲТ Котибияти эксперти Саша Штрупп, БМТнинг Дохадаги кибержиноятчиликка қарши минтақавий маркази эксперти Мэтью Дэвид Уотсон ҳамда бошқа халқаро мутахассислар рақамли терговлар ва кибержиноятчиликка қарши кураш бўйича илғор халқаро тажрибаларни тақдим этдилар.
Шунингдек, Ўзбекистон ва хорижий экспертлар томонидан кибержиноятчиликка қарши ҳуқуқий сиёсат, “E-экспертиза” электрон ҳужжат айланиши тизими, рақамли молиявий фирибгарликка қарши кураш ҳамда юқори технологияларга асосланган суд экспертизасини ривожлантиришга оид амалий ёндашувлар муҳокама қилинди.
Таъкидланганидек, рақамли технологиялар тараққиёти кибержиноятчилик шаклларини ҳам мураккаблаштирмоқда. Шу боис, рақамли далиллар билан ишлашнинг ишончли механизмларини шакллантириш, эксперт кадрларни тайёрлаш ва халқаро ҳамкорликни мустаҳкамлаш бугунги куннинг устувор вазифаларидан бири ҳисобланади.
Иккинчи параллел сессия “TASHKENT CYBERLEX – 2026” форумининг энг амалий ва халқаро ҳамкорликка йўналтирилган муҳокама майдонларидан бири сифатида кибержиноятчиликка қарши кураш соҳасида илғор тажриба, инновацион технологиялар ва ҳуқуқий ёндашувларни бирлаштирди.