Ўзбекистон Республикаси Ҳуқуқни муҳофаза қилиш академиясида “Исботлаш жараёнида суд экспертизаларининг ўрни ва аҳамияти” мавзусида Республика илмий-амалий конференцияси бўлиб ўтди.
Анжуманда мамлакатнинг етакчи олий таълим ва илмий муассасалари, суд-экспертиза ташкилотлари, соҳавий марказлар ва нодавлат ташкилотлар вакиллари, профессор-ўқитувчилар, ёш олимлар ҳамда тадқиқотчилар иштирок этди.
Конференциянинг асосий мақсади суд экспертизаси имкониятларидан исботлаш жараёнида самарали фойдаланиш, ҳуқуқни қўллаш амалиётига замонавий экспертлик ютуқларини татбиқ этиш ҳамда соҳадаги долзарб муаммолар ечимига қаратилган илмий асосланган таклиф ва тавсиялар ишлаб чиқишдан иборат бўлди.
Тадбир доирасида терговга қадар текширув ва дастлабки тергов босқичларида суд экспертизасини тайинлаш ва ўтказиш масалалари, нодавлат суд-экспертиза муассасаларининг ҳуқуқий мақоми, эксперт хулосасининг далил сифатидаги аҳамияти ҳамда тергов ва суд-экспертиза муассасалари ўртасидаги ҳамкорликнинг долзарб жиҳатлари муҳокама қилинди.
Конференция якунида иштирокчилар томонидан билдирилган таклиф ва тавсиялар асосида илмий мақолалар тўпламини нашр этиш режалаштирилди.