Ўзбекистон Республикаси Ҳуқуқни муҳофаза қилиш академиясида бакалавриатнинг 3-босқич “Прокурорлик фаолияти” йўналиши талабалари ўртасида жиноят ишлари бўйича намунавий “Суд процесси имитацияси” танлови ўтказилди.
Танловдан кўзланган асосий мақсад талабаларнинг назарий билимларини амалиёт билан уйғунлаштириш, суд жараёнларини ташкил этиш ва юритиш бўйича амалий кўникмаларини ривожлантиришдан иборат бўлди.
Беллашувда “Адолат”, “Фемида” ҳамда “Қонун” жамоалари иштирок этди. Танлов давомида талабалар жиноят ишларини кўриб чиқиш жараёнида прокурор, судья, адвокат ва бошқа процесс иштирокчиларининг ваколатлари, ҳуқуқий позицияси ҳамда касбий маҳоратини амалий жиҳатдан намоён этдилар.
Иштирокчиларнинг ҳуқуқий билимлари, нотиқлик маҳорати, тезкор фикрлаш қобилияти, жиноят-процессуал қонунчилик нормаларини қўллаш кўникмалари ва суд муҳокамасидаги муомала маданияти ҳакамлар томонидан баҳоланди. Ҳақиқий суд муҳитини акс эттирган суд жараёни имитацияси иштирокчилар ва томошабинларда катта қизиқиш уйғотди.
Юксак рақобат руҳида ўтган танлов якунига кўра, “Адолат” жамоаси ғолибликни қўлга киритди. “Фемида” жамоаси иккинчи, “Қонун” жамоаси учинчи ўринни эгаллади.
Шунингдек, қатор махсус номинациялар бўйича ҳам ғолиблар аниқланди. “Энг яхши судья” номинацияси бўйича Р.Кушмаков, “Энг яхши давлат айбловчиси” – Л.Абдикулова, “Энг яхши адвокат” – О.Абдурайимов ва “Энг яхши иштирокчи” номинациясида Д.Нормуродов ғолиб деб топилди.
Тадбир якунида ғолиб ва совриндорлар кубок, фахрий ёрлиқ ҳамда эсдалик совғалари билан тақдирланди.