Жорий йилнинг 21–22 май кунлари Ўзбекистон Республикаси Ҳуқуқни муҳофаза қилиш академиясининг янги замонавий кампусида “Рақамли даврда қонун устуворлигини таъминлаш: инновациялар, инсон ҳуқуқлари ва хавфсизлик мутаносиблиги” мавзусидаги “TASHKENT CYBERLEX – 2026” халқаро илмий-амалий форуми юқори савияда ўтказилди.
Мамлакатимизда илк бор ташкил этилган мазкур форум киберҳуқуқ, рақамли криминалистика, сунъий интеллект, киберхавфсизлик, рақамли далиллар ва ҳуқуқни муҳофаза қилиш фаолиятининг замонавий чақириқларига бағишланган нуфузли халқаро эксперт платформасига айланди.
Форумда 20 давлат ва 10 га яқин халқаро ташкилотдан 300 дан ортиқ иштирокчи, жумладан, хорижий ва миллий таълим муассасалари, ҳуқуқни муҳофаза қилувчи органлар, халқаро ва минтақавий ташкилотлар раҳбарлари, экспертлар, амалиётчилар ҳамда етакчи олимлар иштирок этди.
Икки кун давомида форум ялпи мажлис ва олтита ихтисослашган эксперт майдони шаклида ташкил қилиниб, рақамли даврда қонун устуворлигини таъминлаш, кибержиноятчиликка қарши курашиш, сунъий интеллектнинг ҳуқуқий жиҳатлари, рақамли криминалистика, криптоактивлар ҳамда халқаро ҳамкорликка оид долзарб масалалар муҳокама қилинди.
Форум доирасида қатор икки томонлама учрашувлар ва эксперт мулоқотлари ўтказилиб, ҳамкорликни янада мустаҳкамлашга қаратилган меморандумлар имзоланди.
Эътиборли жиҳати, халқаро ташкилотлар ва хорижий ҳамкорлар Академиянинг ҳуқуқни муҳофаза қилиш соҳасидаги илмий-таълим ва эксперт салоҳиятини юқори баҳолаб, уни минтақада компетенциялар маркази сифатида ривожлантириш ҳамда мазкур платформа доирасида ҳамкорликни янада кенгайтиришга тайёр эканликларини билдирди.
“TASHKENT CYBERLEX – 2026” форуми рақамли даврда қонун устуворлигини таъминлашга оид халқаро эксперт мулоқотга бўлган эҳтиёж юқорилигини яна бир бор намоён этиб, уни нафақат илмий муҳокамалар, балки амалий ечимлар, янги ҳамкорликлар ва узоқ муддатли халқаро ташаббуслар шаклланадиган глобал платформа сифатида намоён қилди.