Ҳуқуқни муҳофаза қилиш академиясида Ўзбекистон Республикаси Ички ишлар вазири ўринбосари – Тергов департаменти бошлиғи, полковник Рамазон Ашрапов иштирокида “Тергов фаолияти” бакалавриат таълим йўналиши битирувчи талабалари билан учрашув ўтказилди.
Мазкур учрашув ҳуқуқни муҳофаза қилиш органлари учун замонавий билим ва кўникмаларга эга, юксак масъулият ва касбий маданият соҳиби бўлган тергов кадрларини тайёрлаш масалаларига бағишланди.
Мулоқот давомида мамлакатимизда қонун устуворлигини таъминлаш, фуқароларнинг ҳуқуқ ва эркинликларини ишончли ҳимоя қилиш ҳамда тергов фаолиятини замонавий талаблар асосида такомиллаштириш борасида амалга оширилаётган ислоҳотларнинг аҳамияти алоҳида таъкидланди.
Қайд этилганидек, рақамли технологияларнинг жадал ривожланиши ва жиноятчиликнинг янги кўринишлари терговчилардан нафақат мустаҳкам ҳуқуқий билим, балки рақамли далиллар билан ишлаш, кибержиноятларни тергов қилиш, ахборот технологияларидан самарали фойдаланиш ҳамда таҳлилий фикрлаш каби замонавий компетенцияларга эга бўлишни талаб этмоқда.
Шу билан бирга, тергов фаолиятида инсон ҳуқуқлари ва эркинликларини таъминлаш, қонунийликка қатъий риоя қилиш, холислик, адолат ва профессионал этика тамойиллари ҳар қандай қарор ва ҳаракатнинг асосини ташкил этиши лозимлиги таъкидланди. Терговчининг касбий маҳорати аввало унинг масъулияти, ҳалоллиги, қонунга садоқати ва инсон қадрига бўлган ҳурмати билан белгиланиши қайд этилди.
Учрашув давомида битирувчилар билан очиқ мулоқот ўтказилиб, келгусидаги хизмат фаолияти, касбий ривожланиш, ўз устида мунтазам ишлаш ва замонавий билимларни доимий равишда такомиллаштириб бориш масалалари муҳокама қилинди.
Тадбир мамлакатимиз ҳуқуқни муҳофаза қилиш органлари учун профессионал салоҳиятга эга, юксак ҳуқуқий онг ва масъулият билан фаолият юритадиган янги авлод терговчиларини тайёрлашнинг долзарб вазифаларига бағишланган муҳим мулоқот майдони бўлди.