Ўзбекистон Республикаси Ҳуқуқни муҳофаза қилиш академиясида бакалавриат факультети талаба-қизлари учун дуал таълим доирасида “Оила ва хизмат мувозанати” (Work-Life Balance) мавзусида семинар-тренинг ташкил этилди.
Тадбир бўлажак ҳуқуқни муҳофаза қилиш органлари ходималарида гендер тенглиги, маънавий маданият, рақамли гигиена, оилавий қадриятлар ҳамда хизмат фаолияти ва шахсий ҳаёт ўртасидаги мувозанатни таъминлашга оид билим, кўникма ва компетенцияларни ривожлантиришга қаратилди.
Семинар-тренингда Ички ишлар бош бошқармаси маънавият-маърифий ишлар ва кадрлар билан ишлаш бошқармаси бошлиғининг хотин-қизлар масалалари бўйича ўринбосари, подполковник Идаля Миниханова, Психологлар ассоциацияси психологи, психология фанлари номзоди, доцент Хулқар Маҳмудова ҳамда соҳа мутахассислари иштирок этдилар.
Мулоқот давомида замонавий ҳуқуқни муҳофаза қилиш тизимида хотин-қизларнинг ўрни ва роли, касбий фаолиятда психологик барқарорликни таъминлаш, шахсий ривожланиш, вақтни самарали бошқариш, рақамли муҳитда хавфсиз ва масъулиятли фаолият юритиш масалалари муҳокама қилинди.
Таъкидланганидек, ҳуқуқни муҳофаза қилиш органлари учун рақобатбардош ва юқори малакали кадрларни тайёрлаш жараёни нафақат касбий билим ва амалий кўникмаларни шакллантиришни, балки бўлажак мутахассисларнинг маънавий баркамоллиги, психологик барқарорлиги ва ҳаётий компетенцияларини ривожлантиришни ҳам талаб этади.
Семинар-тренинг иштирокчилар учун тажриба алмашиш, долзарб масалаларни муҳокама қилиш ва келгусидаги касбий фаолиятда муҳим аҳамият касб этадиган амалий тавсиялар олиш имконини берди.