Ўзбекистон Республикаси Ҳуқуқни муҳофаза қилиш академияси томонидан Олий таълим, фан ва инновациялар вазирлиги ҳузуридаги Олий таълимни ривожлантириш тадқиқотлари маркази билан ҳамкорликда молиявий хавфсизлик бўйича туркум фан олимпиадаларининг республика босқичи ўтказилди.
Тадбир Жиноий фаолиятдан олинган даромадларни легаллаштиришга ва терроризмни молиялаштиришга қарши курашиш соҳасидаги Халқаро тармоқ институтига аъзо олий таълим муассасалари ҳамда республиканинг бошқа давлат ва нодавлат олий таълим муассасалари талабаларини бир майдонда жамлади.
Олимпиадада Тошкент давлат юридик университети, Тошкент давлат иқтисодиёт университети, Муҳаммад ал-Хоразмий номидаги Тошкент ахборот технологиялари университети ҳамда мамлакатнинг бошқа олий таълим муассасаларидан жами 150 нафардан ортиқ талаба иштирок этди. Улар “Юриспруденция”, “Ахборот хавфсизлиги”, “Иқтисодий хавфсизлик” ва “Халқаро муносабатлар” йўналишлари бўйича молиявий хавфсизлик, ҳуқуқий таҳлил, иқтисодий хавфларни баҳолаш, ахборот хавфсизлиги ва халқаро муносабатларга оид билим ҳамда амалий кўникмаларини намоён этдилар.
Якуний натижаларга кўра, юқори балл тўплаган иштирокчилар I, II ва III даражали дипломлар ҳамда Академиянинг эсдалик совғалари билан тақдирланди. Шунингдек, “Юриспруденция” ва “Иқтисодий хавфсизлик” йўналишларида 3 нафардан, “Ахборот хавфсизлиги” ва “Халқаро муносабатлар” йўналишларида 2 нафардан жами 10 нафар энг юқори натижа кўрсатган талаба молиявий хавфсизлик бўйича халқаро олимпиадада иштирок этиш учун саралаб олинди.
Тадбир доирасида иштирокчилар Академиянинг замонавий таълим ва амалий тайёргарлик инфратузилмаси билан ҳам таништирилди. Улар тергов ҳаракатлари ва суд жараёнларини моделлаштириш учун мўлжалланган махсус ўқув хоналари, криминалистик полигонлар, суд-тиббий экспертиза ва Дарквеб лабораториялари, Коррупцияга қарши курашиш бўйича Виртуал академия ҳамда Рақамли криминалистика институти фаолияти ҳақида маълумот олдилар.
Мазкур олимпиада ёшларнинг молиявий хавфсизлик соҳасидаги билим ва кўникмаларини янада ривожлантириш, иқтидорли талабаларни аниқлаш ва қўллаб-қувватлаш, уларни халқаро интеллектуал беллашувларга тайёрлаш, шунингдек, иқтисодий жиноятчилик, коррупция, жиноий даромадларни легаллаштириш ва терроризмни молиялаштиришга қарши курашиш соҳалари учун истиқболли кадрлар захирасини шакллантиришга хизмат қилади.