Жиноятчиликни олдини олиш ва назорат қилиш Европа институти (HEUNI) директори билан учрашув

2019 йил 24 январь куни Бош прокуратура Академияси раҳбариятининг Швеция ва Финляндия давлатларига ташрифи доирасида, БМТ билан боғлиқ, Жиноятчиликни олдини олиш ва назорат қилиш Европа институти (кейинги матнда – HEUNI) директори Н.Оллус билан учрашув бўлиб ўтди.

Учрашув жаранида, HEUNI ташкилотининг жиноятчиликни олдини олиш, жиноят судлов тизими фаолияти самарадорлигини баҳолашда инновацион солиштирув тадқиқотларини ташкил этиш, методологияси, қўлланма ва материаллар ишлаб чиқиш тажрибаси асосида бир қатор европа давлатларида жиноятчиликни олдини олиш миллий стратегияси ишлаб чиқилиб амалга оширилиб келинаётганлиги таъкидлаб ўтилди.

Учрашув давомида Бош прокуратура Академияси HEUNI ташкилоти билан биргаликда илмий тадқиқотлар ўтказиш, норматив-ҳуқуқий, методик ва таҳлилий маълумотлар билан алмашиш, ўқув жараёнига ҳорижий мутахассисларни жалб қилиш соҳаларидаги ҳамкорликнинг истиқболли йўналишларини муҳокама қилиб олишди.

Учрашув натижаларига кўра, HEUNI директори Н.Оллусни жиноятчиликни олдини олиш ва прокуратура органлари ҳодимларини касбий тайёрлаш тизимини такомиллаштириш соҳасида олиб борилаётган ишлар билан таништириш ҳамда ҳамкорликнинг ҳуқуқий асосларини мустаҳкамлаш мақсадида Ўзбекистонга ташрифи ҳақида дастлабки келишувга эришилди.