Ўзбекистон Республикаси Ҳуқуқни муҳофаза қилиш академиясида Ўзбекистон Республикаси Миллий гвардияси суриштирувчилари учун ташкил этилган малака ошириш курси муваффақиятли якунланди.
Мазкур ўқув дастури суриштирув фаолияти самарадорлигини ошириш, жиноятларни терговга қадар текшириш ва суриштириш жараёнларида қонунчилик талабларини тўғри қўллаш бўйича касбий билим ҳамда амалий кўникмаларни мустаҳкамлашга қаратилди.
Машғулотлар доирасида тингловчилар жиноятларни тергов қилишда криминалистик услубиятдан фойдаланишнинг замонавий ёндашувлари, манфаатлар тўқнашуви билан боғлиқ ҳуқуқий муносабатлар, пиротехника буюмларининг қонунга хилоф муомаласига оид жиноятларни тергов қилиш хусусиятлари, шунингдек суриштирув ва тергов амалиётида учрайдиган долзарб масалалар бўйича билим ва кўникмаларини такомиллаштирдилар.
Ўқув жараёнида қонунчиликни қўллаш амалиёти, далилларни тўплаш ва баҳолаш, процессуал қарорлар қабул қилиш ҳамда ҳуқуқни муҳофаза қилиш фаолияти самарадорлигини ошириш масалаларига алоҳида эътибор қаратилди. Машғулотлар интерактив таълим усуллари, кейс-таҳлиллар ва амалий вазиятлар асосида ташкил этилди.
Курс доирасида тингловчилар Академиянинг замонавий таълим инфратузилмаси, криминалистика ва суд экспертизаси соҳасидаги ўқув-амалий имкониятлари билан ҳам танишдилар.
Малака ошириш курси якунида тингловчиларга белгиланган намунадаги сертификатлар топширилди.