Ўзбекистон Республикаси Ҳуқуқни муҳофаза қилиш академиясида 2026/2027 ўқув йили учун магистратурага қабул бошланди.
Ҳужжатлар 10 июндан 31 июлга қадар Ўзбекистон Республикаси Олий таълим муассасаларига қабул қилишнинг ягона электрон платформаси – my.uzbmb.uz орқали қабул қилинади.
Академия магистратураси ҳуқуқни муҳофаза қилувчи органлар, давлат бошқаруви ва ҳуқуқни қўллаш амалиёти учун юқори малакали мутахассислар тайёрлашга қаратилган замонавий таълим дастурларини амалга оширади.
2026/2027 ўқув йили учун қуйидаги мутахассисликлар бўйича қабул амалга оширилади:
- Прокурорлик фаолияти;
- Прокурорлик фаолияти (кечки ва масофавий таълим шакллари);
- Коррупцияга қарши курашиш;
- Инсон ҳуқуқларига оид халқаро ҳуқуқ;
- Киберхавфсизликни ҳуқуқий таъминлаш (масофавий таълим шакли, рус тили гуруҳи).
«Киберхавфсизликни ҳуқуқий таъминлаш» мутахассислиги Ўзбекистон Республикаси Президентининг рақамли технологиялар соҳасидаги жиноятларга қарши курашиш учун профессионал кадрлар тайёрлаш тизимини жорий этишга қаратилган қарорлари асосида ташкил этилган.
Мазкур мутахассислик бўйича Рақамли технологиялар вазирлиги томонидан тасдиқланган нуфузли халқаро IT-сертификатларга эга бўлган номзодлар мутахассислик фанлари бўйича «Информатика ва ахборот технологиялари» фанидан кириш имтиҳонини топширишдан озод этилади.
Шунингдек, ушбу йўналишга қабул қилинган тингловчиларнинг охирги эгаллаб турган лавозими бўйича белгиланган тартиб ва миқдорда меҳнатга ҳақ тўлаш фонди тўловлари (пул таъминоти) сақланади.
Очиқ танлов асосида давлат грантига қабул қилинган тингловчиларга қонунчиликда белгиланган тартиб ва миқдорда ҳар ойлик стипендия тўланади.
Кириш синовлари август ойида ўтказилади.
Магистратурага қабул қилиш ва ўқитишни ташкил этиш тартиби билан қуйидаги ҳавола орқали танишиш мумкин:
Қабул жараёни ва кириш имтиҳонларига оид янгиликлар Академиянинг расмий веб-сайти ва ижтимоий тармоқлардаги расмий саҳифалари орқали мунтазам эълон қилиб борилади.
Қўшимча маълумот учун:
️ 71-202-04-96 (ички рақамлар: 1795, 1716)