Жорий йилнинг 11 июнь куни Ўзбекистон Республикаси Ҳуқуқни муҳофаза қилиш академиясининг таклифига биноан Корея Республикаси Адлия институти директори Ли Чжу Ён бошчилигидаги делегациянинг ташрифи бошланди.
Ташрифнинг биринчи куни дастури делегациянинг Академия раҳбарияти билан икки томонлама учрашувидан бошланди. Учрашув давомида меҳмонларга Академия фаолияти, унинг ташкилий тузилмаси, асосий фаолият йўналишлари, шунингдек, замонавий таълим ва илмий-амалий инфратузилмаси ҳақида батафсил маълумот тақдим этилди.
Делегация аъзоларига илғор педагогик ва ахборот технологияларини қўллаш асосида ташкил этилган ҳамда тингловчиларда амалий касбий кўникмаларни шакллантиришга йўналтирилган таълим жараёнлари намойиш этилди.
Бундан ташқари, меҳмонлар Юридик клиника, Ситуацион марказ, электрон таълим тизими, Рақамли криминалистика илмий-тадқиқот институти, Коррупцияга қарши курашиш виртуал академияси ҳамда Ахборот-ресурс маркази фаолияти билан танишдилар.
Учрашув конструктив ва амалий йўналтирилган руҳда ўтди. Корея Республикаси Адлия институти вакилларида таълим, илм-фан ва амалиёт интеграцияси асосида ташкил этилган Академия фаолияти алоҳида қизиқиш уйғотди.
Учрашув якунлари бўйича томонлар прокурор кадрларни тайёрлаш, қайта тайёрлаш ва малакасини ошириш, шунингдек ҳуқуқни муҳофаза қилиш фаолиятининг долзарб йўналишлари бўйича тажриба алмашиш соҳасида ҳамкорликни янада кенгайтиришга келишиб олдилар.
Делегациянинг Академияга ташрифи давом этмоқда. Ташриф натижалари икки томонлама ҳамкорликни ривожлантиришга янги туртки бериши кутилмоқда.