Ҳуқуқбузарликлар профилактикасини бевосита амалга оширувчи органлар вакиллари билан ишчи учрашувлар

Жорий йилнинг 21 январидан 24 январига қадар Бош прокуратура Академиясининг Жиноятларнинг содир этилиши сабаларини тизимли таҳлил қилиш ва ўрганиш маркази ходимлари Хоразм вилоятида ҳуқукбузарликлар профилактикасини бевосита амалга оширувчи орган ва муассасаларнинг вакиллари билан бир қатор ишчи учрашувлар ўтказишди.

Мазкур учрашувлар Ўзбекистон Республикаси Президентининг 2018 йил 24 декабрдаги «Жамоат хавфсизлигини таъминлаш самарадорлигини ошириш бўйича қўшимча чора-тадбирлар тўғрисида»ги ПҚ-4075-сонли Қарори ҳамда Президентнинг 2018 йил 10 январь куни Президент ҳузуридаги Хавфсизлик Кенгашининг кенгайтирилган мажлисида берган топшириқлари асосида жиноятларнинг содир этилиши сабабларини тизимли таҳлил қилиш ва ўрганиш, ҳуқуқбузарликлар профилактикаси ва жамоат хавфсизлигини таъминлаш самарадорлигини ошириш бўйича прокуратура органлари олдига қўйилган вазифаларни бажариш мақсадида ташкил этилган.

Жиноятчилик ҳолати таҳлиллари ҳудудда йўл-транспорт ҳодисалари билан боғлиқ, шу жумладан маст ҳолатдаги шахслар томонидан жиноятлар содир этилиши салмоғи юқорилигини кўрсатгани боис, ишчи учрашувлар давомида транспорт воситалари ҳаракати ёки улардан фойдаланиш хавфсизлиги қоидаларини бузиш билан боғлиқ ҳуқуқбузарликлар профилактикаси самарадорлигини ошириш, шунингдек алкоголни суиистеъмол қилувчи шахслар ўртасида ҳуқуқбузарликларнинг махсус профилактикаси фаолиятида тизимли камчиликларни аниқлаш ва уларни бартараф қилиш чораларини кўришга алоҳида эътибор қаратилди.

Бундан ташқари, ишчи гуруҳ томонидан наркологик диспансерлар иши ўрганиб чиқилиб, тизимдаги мавжуд муаммоларни ҳал қилиш ҳамда фаолиятини самарали олиб боришини таъминлаш мақсадида аниқ чора-тадбирлар ва вазифалар белгилаб олинди.