Ўзбекистон Республикаси Ҳуқуқни муҳофаза қилиш академияси раҳбарияти Шанхай шаҳрида бўлиб ўтган Ўзбекистон ва Хитой етакчи таҳлил марказларининг “10+10” форумида иштирок этди.
“Ўзбекистон – Хитой муносабатларининг янги босқичи: умумий қараш ва умумий келажак” мавзусида ташкил этилган форум икки мамлакатнинг етакчи таҳлил марказлари, илмий-тадқиқот ва таълим муассасалари раҳбарлари ҳамда экспертларини бир майдонга жамлади. Тадбир доирасида стратегик шерикликни янада ривожлантириш, миллий тараққиёт устуворликлари, минтақавий хавфсизлик ва барқарор ривожланиш масалалари муҳокама қилинди.
Форум ишида Академия бошлиғининг биринчи ўринбосари, профессор Евгений Вячеславович Коленко Ўзбекистон делегацияси таркибида иштирок этди. У “Ўзбекистон ва Хитой: тараққиёт бўйича умумий ёндашувлар ва умумий миллий устуворликлар” мавзусидаги сессияга модераторлик қилди.
Шунингдек, Е.В. Коленко “Ўзбекистон–Хитой ҳамкорлигининг кўп томонлама форматлари: ШҲТ, “Бир макон, бир йўл”, “Хитой – Марказий Осиё” саммити ва бошқа платформалар” мавзусидаги сессия доирасида маъруза қилди.
Маърузада замонавий чақириқлар шароитида ҳуқуқшунослик ва ҳуқуқни муҳофаза қилиш фаолиятида таҳлилий ёндашувларнинг аҳамияти, ҳуқуқий қарорлар қабул қилиш жараёнларини илмий ва экспертлик жиҳатдан таъминлаш, шунингдек, рақамлаштириш шароитида ҳуқуқни қўллаш амалиётини такомиллаштириш масалаларига алоҳида эътибор қаратилди.
Шунингдек, Академия томонидан ҳуқуқий ислоҳотларни илмий ва эксперт-таҳлилий жиҳатдан қўллаб-қувватлаш, ҳуқуқни муҳофаза қилувчи органлар учун юқори малакали кадрлар тайёрлаш, илмий тадқиқотлар натижаларини амалиётга татбиқ этиш ҳамда халқаро ҳамкорликни ривожлантириш борасида амалга оширилаётган ишлар тақдим этилди.
Форум доирасида таҳлилий, илмий-тадқиқот ва таълим соҳаларидаги Ўзбекистон–Хитой ҳамкорлигини янада ривожлантириш истиқболлари, шунингдек долзарб минтақавий ва халқаро чақириқларга нисбатан умумий ёндашувларни ишлаб чиқиш масалалари муҳокама қилинди.
Форум экспертлар мулоқотини мустаҳкамлаш, тажриба алмашиш ва Ўзбекистон ҳамда Хитойнинг таҳлил марказлари, илмий ва таълим муассасалари ўртасидаги ҳамкорликни кенгайтириш учун муҳим майдон бўлиб хизмат қилди.