Жиноятчиликнинг барвақт олдини олиш, унинг сабаб ва шарт-шароитларини бартараф этиш ҳамда маҳаллаларда хавфсиз муҳитни шакллантириш бўйича белгилаб берилган вазифалар ижроси доирасида Ҳуқуқни муҳофаза қилиш академияси томонидан Жиззах вилоятида комплекс илмий-амалий ишлар изчил давом эттирилмоқда.
Академия мутахассислари иштирокида вилоятнинг шаҳар ва туманларидаги криминоген вазият чуқур таҳлил қилиниб, жиноятчиликка таъсир кўрсатаётган омиллар, унинг келиб чиқиш сабаблари ҳамда шарт-шароитлари илмий ёндашувлар асосида ўрганилди. Ўтказилган таҳлиллар натижасида ҳар бир ҳудуднинг ўзига хос хусусиятлари ва мавжуд хавф омилларидан келиб чиққан ҳолда жиноятчиликнинг олдини олишга қаратилган манзилли илмий-амалий тавсиялар ишлаб чиқилди.
Айни пайтда мазкур тавсияларни амалиётга самарали татбиқ этиш, профилактик фаолият натижадорлигини ошириш ва ҳудудлардаги ҳуқуқбузарликлар ҳолатига таъсирини баҳолаш бўйича ўрганишлар олиб борилмоқда.
Шу билан бирга, маҳаллаларда ҳуқуқбузарликлар профилактикаси тизимини мустаҳкамлаш мақсадида «маҳалла еттилиги» аъзолари учун тизимли ўқув-семинарлар ташкил этилмоқда. Уларда ҳуқуқий билимларни ошириш, оилавий низоларнинг барвақт олдини олиш, ижтимоий профилактика механизмларини такомиллаштириш ҳамда аҳоли билан манзилли ишлаш кўникмаларини ривожлантириш масалаларига алоҳида эътибор қаратилмоқда.
Олиб борилаётган ишлар, эришилган натижалар ва келгусида амалга оширилиши режалаштирилган чора-тадбирлар юзасидан Бош прокурорнинг биринчи ўринбосарига тақдимот қилинди. Тақдимот давомида ҳудудларда жиноятчиликнинг барвақт олдини олишга қаратилган илмий ёндашувларни амалиёт билан уйғунлаштириш, профилактика фаолияти самарадорлигини янада ошириш ҳамда соҳадаги ҳамкорликни кенгайтириш масалалари муҳокама қилинди.