Ўзбекистон Республикаси Ҳуқуқни муҳофаза қилиш академияси томонидан банк тизими комплаенс бўлинмалари ходимлари учун жиноий даромадларни легаллаштириш ва терроризмни молиялаштиришга қарши курашишнинг замонавий механизмлари, халқаро стандартларни жорий этиш ҳамда ички назорат самарадорлигини ошириш масалаларига бағишланган махсус ўқув семинари ташкил этилди.
Тадбир Академия ҳамда Трастбанк ҳамкорлигида ўтказилиб, унда банк соҳасида қонунчилик талабларига риоя этиш, молиявий хавфсизликни таъминлаш ва комплаенс назорати самарадорлигини оширишнинг долзарб жиҳатлари муҳокама қилинди.
Семинар давомида иштирокчиларга мазкур йўналишдаги миллий қонунчилик нормалари, халқаро ФАТФ стандартлари, молиявий операциялардаги хавфларни аниқлаш ва баҳолаш, санкциявий чекловларга риоя этиш ҳамда шубҳали операцияларни аниқлаш мезонлари бўйича тизимли билимлар тақдим этилди.
Амалий машғулотларда банк тизимида манфаатлар тўқнашувининг олдини олиш, ички назорат механизмларини такомиллаштириш, мижозларни лозим даражада ўрганиш ва таваккалчиликка асосланган ёндашувни кучайтириш масалалари реал кейслар асосида таҳлил қилинди. Машғулотлар очиқ мулоқот ва савол-жавоб шаклида ташкил этилди.
Тадбирда Ўзбекистон Республикаси Марказий банки ҳамда Бош прокуратура ҳузуридаги Иқтисодий жиноятларга қарши курашиш департаменти мутахассислари иштирок этиб, соҳадаги илғор тажриба ва амалий ёндашувлар билан ўртоқлашдилар.
Ўқув машғулотлари иштирокчиларнинг комплаенс хавфларини бошқариш, молиявий мониторингни амалга ошириш ҳамда банклар фаолиятининг миллий қонунчилик ва халқаро стандартлар талабларига мувофиқлигини таъминлаш соҳасидаги касбий компетенцияларини янада кенгайтиришга хизмат қилди.
Таъкидланганидек, мазкур ҳамкорлик банк секторида қонун устуворлиги, шаффофлик ва молиявий хавфсизликни таъминлашга қаратилган тизимли саъй-ҳаракатларни янада кучайтиришга хизмат қилади.