Ҳуқуқни муҳофаза қилиш академияси Рақамли криминалистика илмий-тадқиқот институти томонидан Сирдарё вилояти прокуратурасида ўтказилган амалий семинар доирасида замонавий рақамли ечимлар ва илғор криминалистик ишланмалар тақдим этилди.
Тадбир тергов фаолиятида рақамли технологиялардан самарали фойдаланиш, замонавий ахборот тизимларини амалиётга жорий этиш ҳамда кибержиноятларга қарши курашиш самарадорлигини ошириш масалаларига бағишланди.
Семинар давомида Институт ходимлари Ўзбекистон Республикаси Президентининг ПҚ–229-сон қарори доирасида ишлаб чиқилган рақамли криминалистиканинг техник воситалари билан жиҳозланган махсус жамланманинг функционал имкониятларини намойиш этдилар. Унинг рақамли далиллар билан ишлаш, уларни йиғиш, сақлаш ва таҳлил қилиш жараёнларида қўллашнинг амалий жиҳатлари ҳақида батафсил маълумот берилди.
Шунингдек, иштирокчиларга “Кўчма рақамли криминалистика лабораторияси”нинг техник имкониятлари таништирилди. Намойиш давомида жиноятларни аниқлаш, рақамли далилларни мустаҳкамлаш ва таҳлил қилиш, ҳуқуқбузарликларни фош этишда қўлланилаётган замонавий технологиялар ҳамда илғор криминалистик усуллар тақдим этилди.
Очиқ мулоқот шаклида ўтган тадбирда тергов фаолиятини рақамлаштириш, ҳуқуқни муҳофаза қилувчи органлар амалиётига замонавий криминалистик технологияларни интеграция қилиш ва ахборот-коммуникация технологиялари ёрдамида содир этилаётган жиноятларга қарши курашишнинг долзарб масалалари муҳокама қилинди.
Бундай тадбирлар рақамли криминалистика имкониятларини амалиётга кенг жорий этиш, соҳадаги идоралараро ҳамкорликни мустаҳкамлаш ҳамда тергов фаолияти самарадорлигини янада оширишга хизмат қилади.