АҚШдаги хизмат ташрифи дастури доирасида Ўзбекистон Республикаси Ҳуқуқни муҳофаза қилиш академияси делегацияси Техас штати Форт-Уэрт шаҳрида бўлиб ўтган ҳуқуқни муҳофаза қилиш органлари учун кадрлар тайёрлаш ва соҳа стандартларини ривожлантиришга бағишланган энг нуфузли халқаро майдонлардан бири – Ҳуқуқни муҳофаза қилиш органларида таълим ва стандартлар бўйича халқаро директорлар ассоциацияси (IADLEST) конференциясида иштирок этди.
1987 йилда ташкил этилган IADLEST ассоциацияси АҚШ штатларидаги POST кенгашлари, етакчи полиция академиялари ҳамда турли мамлакатларнинг соҳавий ташкилотларини бирлаштиради. Ассоциациянинг йиллик конференцияси ҳуқуқни муҳофаза қилиш соҳаси учун кадрлар тайёрлаш, замонавий таълим технологияларини жорий этиш ва касбий стандартларни такомиллаштириш масалаларини муҳокама қилишга бағишланган нуфузли халқаро платформа ҳисобланади.
Тадбирнинг дастлабки кунларида Академия вакиллари расмий учрашувлар, соҳавий кўргазмалар ҳамда мутахассислар муҳокамаларида иштирок этиб, халқаро ҳамкорликни ривожлантириш, илғор тажриба алмашиш ва касбий алоқаларни кенгайтириш масалалари юзасидан мулоқотлар ўтказдилар.
Конференция иштирокчиларида ҳуқуқни муҳофаза қилувчи органлар ходимларининг эмоционал барқарорлиги, таълим дастурларини халқаро аккредитациядан ўтказиш тажрибаси, раҳбар кадрларни тайёрлаш ҳамда сунъий интеллект технологияларидан таълим жараёнида фойдаланиш масалаларига бағишланган тақдимотлар катта қизиқиш уйғотди.
Тематик сессияларда ходимларнинг психологик, ахлоқий ва жисмоний тайёргарлигини такомиллаштиришнинг замонавий ёндашувлари муҳокама қилинди. Экспертлар эмоционал интеллектни ўқув жараёнига интеграция қилиш, илмий асосланган таълим методикаларини қўллаш, деэскалация кўникмаларини ривожлантириш ҳамда шахсий хусусиятларни ҳисобга олган ҳолда хавфсиз мулоқотни ташкил этиш бўйича илғор тажрибаларни тақдим этдилар.
Шунингдек, кадрлар тайёрлаш жараёнига инновацион ва рақамли технологияларни жорий этиш масалаларига алоҳида эътибор қаратилди. Иштирокчилар виртуал реаллик технологиялари асосида ўқув машғулотларини ташкил этиш, таълим дастурлари самарадорлигини баҳолаш ҳамда хизмат фаолияти хавфсизлигини оширишга қаратилган замонавий ечимлар билан танишдилар.
Конференцияда иштирок этиш ҳуқуқни муҳофаза қилиш органлари учун кадрлар тайёрлаш соҳасидаги илғор халқаро тажрибани ўрганиш, хорижий ҳамкорлар билан касбий алоқаларни мустаҳкамлаш ҳамда Академия таълим фаолиятини янада такомиллаштиришнинг истиқболли йўналишларини белгилаб олиш имконини берди.