Ҳуқуқни муҳофаза қилиш академияси томонидан “маҳалла еттилиги” ва ҳуқуқ-тартибот органлари ходимлари учун ташкил этилган махсус ўқув курслари якунланди. Машғулотлар маҳаллаларда ҳуқуқбузарликларнинг барвақт олдини олиш, ижтимоий профилактика самарадорлигини ошириш ҳамда жамоат хавфсизлигини таъминлаш соҳасидаги амалий кўникмаларни мустаҳкамлашга қаратилди.
Ўзбекистон Республикаси Президентининг жиноятчиликнинг барвақт олдини олиш, маҳаллаларда хавфсиз муҳитни шакллантириш ва жамоат хавфсизлигини самарали таъминлашга қаратилган қарорлари ҳамда берилган топшириқлар ижросини таъминлаш мақсадида Ҳуқуқни муҳофаза қилиш академияси томонидан Тошкент шаҳрининг Академияга бириктирилган Яшнобод, Шайхонтоҳур ва Бектемир туманларидаги 136 та маҳаллада сайёр ўқув машғулотлари ташкил этилди.
Ўқув машғулотлари Академия профессор-ўқитувчилари, шунингдек, бошқа олий таълим муассасалари ва масъул ташкилотлардан жалб қилинган олимлар ҳамда мутахассислар томонидан 10 ҳафта давомида олиб борилди.
Машғулотлар ягона дастур асосида ташкил этилиб, “Жиноятларни барвақт олдини олиш”, “Ижтимоий профилактика”, “Наркожиноятларга қарши курашиш”, “Маъмурий-юрисдикцион фаолият”, “Амалий психология”, “Муаммоли социология”, “Рақамли саводхонлик”, “Кибермаданиятни шакллантириш” ҳамда “Иш юритишни ташкил этиш” каби муҳим йўналишларни қамраб олди.
Ўқув жараёнида ҳуқуқбузарликларнинг барвақт олдини олиш, аҳоли билан ишлашнинг замонавий механизмларини жорий этиш, ижтимоий профилактика самарадорлигини ошириш ҳамда жамоат хавфсизлигини таъминлаш соҳасидаги амалий кўникмаларни мустаҳкамлашга алоҳида эътибор қаратилди. Машғулотларда амалий кейслар, интерактив усуллар ва ҳаётий вазиятларга асосланган машқлардан кенг фойдаланилди.
Махсус ўқув курслари доирасида жами 738 нафар маҳалла раислари, ҳоким ёрдамчилари, хотин-қизлар фаоллари, ёшлар етакчилари ҳамда профилактика инспекторларининг малакаси оширилди. Курс якунида барча тингловчилар якуний синовларни муваффақиятли топшириб, сертификатларга эга бўлдилар.
Мазкур ўқув курслари маҳаллаларда ҳуқуқбузарликларнинг барвақт олдини олиш, аҳоли муаммоларини манзилли ҳал этиш, жамоат хавфсизлигини таъминлаш ҳамда “маҳалла еттилиги” фаолияти самарадорлигини янада оширишга хизмат қилади.