Ўзбекистон Республикаси Ҳуқуқни муҳофаза қилиш академияси талабалари ва ходимлари Нидерландия Қироллигининг Гаага шаҳрида Лейден университети ҳузурида ташкил этилган IBA ICC Moot Court Competition 2026 халқаро мусобақасида иштирок этмоқда. Мазкур нуфузли майдон халқаро жиноят ҳуқуқи ва халқаро гуманитар ҳуқуқ соҳасида назарий билимларни амалиёт билан уйғунлаштириш ҳамда профессионал кўникмаларни ривожлантириш имконини беради.
Мусобақа доирасида иштирокчилар Халқаро жиноят суди фаолияти асосида ташкил этилган суд жараёнлари симуляциясида иштирок этиб, прокурор, ҳимоячи ва давлат вакили сифатида ҳуқуқий позицияларни ҳимоя қиладилар.
Жамоалар томонидан ёзма ҳуқуқий ҳужжатлар ва процессуал меморандумлар тайёрланиб, оғзаки баҳс-мунозараларда иштирок этилади. Ҳуқуқий позициялар Халқаро жиноят суди судьялари, профессорлар ва халқаро ҳуқуқ соҳасидаги етакчи мутахассислар иштирокида ҳимоя қилинади.
Мусобақа иштирокчилари халқаро жиноят ҳуқуқи ва халқаро гуманитар ҳуқуқ нормаларини амалиётда қўллаш, ҳуқуқий тадқиқотлар олиб бориш, халқаро-ҳуқуқий манбаларни таҳлил қилиш, ҳуқуқий ҳужжатлар тайёрлаш ҳамда оммавий нутқ сўзлаш кўникмаларини ривожлантириш имкониятига эга бўладилар.
Шунингдек, мазкур мусобақа танқидий ва аналитик фикрлаш, жамоавий ишлаш, музокаралар олиб бориш ва ҳуқуқий позицияларни асосли ҳимоя қилиш бўйича амалий тажрибани бойитиш, шунингдек, халқаро ҳуқуқ соҳасидаги экспертлар билан профессионал мулоқотни йўлга қўйишга хизмат қилади.
Ҳуқуқни муҳофаза қилиш академияси жамоасининг ушбу халқаро мусобақадаги иштироки ёш юристларнинг интеллектуал салоҳиятини намоён этиш, шунингдек, миллий юридик таълим ва илм-фаннинг халқаро майдондаги нуфузини мустаҳкамлашга хизмат қилади.