Ўзбекистон Республикаси Ҳуқуқни муҳофаза қилиш академияси томонидан банк тизимида комплаенс маданиятини ривожлантириш, жиноий даромадларни легаллаштириш ва терроризмни молиялаштиришга қарши курашиш соҳасидаги замонавий ёндашувларни кенг жорий этишга қаратилган тизимли ишлар изчил амалга оширилмоқда. Ана шундай тадбирлардан навбатдагиси “Анор банк” ва “Универсал банк” хусусий акциядорлик тижорат банклари билан ҳамкорликда банк комплаенс бўлинмалари ходимлари учун ташкил этилди.
Малака ошириш ўқув семинари доирасида иштирокчиларга жиноий даромадларни легаллаштириш ва терроризмни молиялаштиришга қарши курашиш соҳасидаги миллий қонунчилик нормалари, ФАТФ халқаро стандартлари, банк тизимида манфаатлар тўқнашувининг олдини олиш, молиявий операциялардаги хавфларни баҳолаш, санкциявий чекловлар ҳамда шубҳали операцияларни аниқлаш мезонлари юзасидан тизимли билимлар тақдим этилди.
Алоҳида эътибор банк амалиётида учрайдиган хавфлар ва камчиликларни барвақт аниқлаш, уларни бартараф этиш механизмлари, шунингдек, ички назорат тизимини такомиллаштириш масалаларига қаратилди.
Ўқув жараёни назарий билимлар билан чекланиб қолмай, халқаро стандартларни миллий амалиётга татбиқ этиш, таваккалчиликка асосланган ёндашувни кучайтириш ҳамда мижозларни лозим даражада ўрганиш масалалари бўйича реал кейслар асосида ташкил этилди.
Семинарда Ўзбекистон Республикаси Марказий банки ҳамда Бош прокуратура ҳузуридаги Иқтисодий жиноятларга қарши курашиш департаменти мутахассислари иштирок этиб, соҳадаги илғор тажриба ва амалий ёндашувлар билан ўртоқлашдилар.
Тадбир якунида иштирокчилар манфаатлар тўқнашувини олдини олиш, хавфларни баҳолаш, шубҳали операцияларни таҳлил қилиш, ички назорат тизимини самарали ташкил этиш ҳамда комплаенс маданиятини мустаҳкамлашга доир амалий кўникмаларини янада такомиллаштирдилар.
Таъкидланганидек, давлат органлари, илмий-таълим муассасалари ва молия секторининг ўзаро ҳамкорлиги банк тизимида қонун устуворлиги, шаффофлик ва молиявий хавфсизликни таъминлашга қаратилган саъй-ҳаракатларни янада кучайтиришга хизмат қилади.