Ҳуқуқни муҳофаза қилувчи органларнинг олий таълим ташкилотлари консорциуми ҳамда Ўзбекистон Республикаси Ёшлар ишлари агентлиги ташаббуси билан ташкил этилган ўқув-семинар замонавий билим ва кўникмаларга эга, стратегик фикрлайдиган ҳамда жамоада самарали ишлай оладиган ёш мутахассисларни тайёрлашга қаратилган мулоқот ва тажриба алмашиш майдонига айланди.
Тошкент вилояти Бўстонлиқ туманида жойлашган “Ёшлар оромгоҳи”да ўтказилган тадбирда Ҳуқуқни муҳофаза қилиш академияси талабалари, шунингдек Жамоат хавфсизлиги университети, Ички ишлар вазирлиги академияси, Фавқулодда вазиятлар вазирлиги академияси ва Божхона институти курсантлари иштирок этдилар.
Беш кунлик дастур стратегик лидерлик, замонавий давлат бошқаруви, медиакоммуникациялар, ёшлар сиёсати, киберхавфсизлик, сунъий интеллект, маълумотлар таҳлили ҳамда инновацион фикрлаш каби долзарб йўналишларни қамраб олди.
Дастур доирасида соҳа мутахассислари ва экспертлари иштирокида учрашувлар, амалий машғулотлар ва жамоавий лойиҳалар ташкил этилди. Бу эса иштирокчиларнинг ташаббускорлиги, мулоқот маданияти, стратегик фикрлаш ва жамоада самарали ишлаш кўникмаларини ривожлантиришга хизмат қилди.
Шунингдек, Консорциумга аъзо олий таълим муассасалари талабалари ва курсантлари ўртасида ўзаро тажриба алмашиш, профессионал алоқаларни мустаҳкамлаш ва келгусида қўшма ташаббусларни амалга ошириш учун самарали ҳамкорлик муҳити шаклланди.
Мазкур лойиҳа ҳуқуқни муҳофаза қилувчи органлар тизими учун юксак лидерлик салоҳиятига эга, замонавий фикрлайдиган ва ўзгарувчан шароитларда самарали фаолият юритишга қодир кадрларни тайёрлашга қаратилган саъй-ҳаракатларнинг амалий ифодаси бўлди.