Ҳуқуқни муҳофаза қилиш академиясининг Рақамли криминалистика илмий-тадқиқот институти мутахассислари томонидан Самарқанд вилояти прокуратураси ҳамда вилоят ички ишлар органлари терговчилари учун ахборот технологиялари ёрдамида содир этилаётган жиноятларни аниқлаш ва тергов қилиш масалаларига бағишланган ўқув-амалий семинар ўтказилди.
Тадбир Ўзбекистон Республикаси Президенти раислигида жорий йилнинг 27 январь куни ўтказилган видеоселектор йиғилишида белгиланган, хусусан, тергов сифатини тубдан ошириш ва унинг шаффофлигини таъминлашга қаратилган вазифалар ижроси доирасида ташкил этилди.
Семинарда кибержиноятларни фош этишда тезкор ахборот алмашинувини таъминлаш, рақамли далилларни олиш, қайд этиш ва сақлаш жараёнида уларнинг яхлитлиги ҳамда далиллар занжири сақланишини таъминлаш масалалари муҳокама қилинди.
Шунингдек, электрон қурилмалар ва онлайн платформалардаги ахборот билан ишлаш, рақамли изларни аниқлаш, олинган маълумотларни процессуал тартибда мустаҳкамлаш ҳамда уларга ҳуқуқий баҳо беришнинг муҳим жиҳатлари юзасидан тушунтиришлар берилди.
Тадбир давомида иштирокчилар тергов амалиётида юзага келаётган долзарб масалаларни муҳокама қилиб, кибержиноятларни тергов қилишда замонавий ёндашувларни қўллаш бўйича ўзаро фикр ва тажриба алмашдилар.