Ҳуқуқни муҳофаза қилиш академиясида таклиф этилган профессор, АҚШнинг Фулбрайт дастури мутахассиси, криминология соҳасидаги таниқли олим Лиэнн Аларид иштирокида май–июнь ойларида амалга оширилган академик дастур таълим мазмунини бойитиш, рақамли ўқув ресурсларини такомиллаштириш ва илмий ҳамкорликни мустаҳкамлашга қаратилди.
Дастур доирасида профессор бакалавриат талабалари ва магистратура тингловчилари учун махсус ўқув машғулотлари ҳамда илмий-академик мулоқотлар ўтказди. «Theories of Crime» мавзусида жиноятчиликнинг келиб чиқиш сабабларини изоҳловчи замонавий криминологик назариялар, «Domestic Abuse» мавзусида эса оилавий зўравонликнинг олдини олиш ва уни криминологик таҳлил қилиш масалалари кенг ёритилди.
Машғулотларда жиноятчиликни илмий таҳлил қилишнинг замонавий ёндашувлари, криминологик назарияларни амалиёт билан боғлаш ҳамда таълим олувчиларнинг таҳлилий фикрлаш кўникмаларини ривожлантиришга алоҳида эътибор қаратилди.
Профессор Лиэнн Аларид 21–22 май кунлари Академияда ўтказилган “TASHKENT CYBERLEX – 2026” халқаро илмий-амалий форумида ҳам иштирок этиб, “Кибержиноятчилик назарияси” мавзусида тақдимот қилди.
Академик дастурнинг муҳим йўналишларидан бири рақамли таълим ресурсларини ривожлантириш бўлди. Профессорнинг экспертлик кўмаги асосида «Theories of Crime» ва «Police Responses to Family/Domestic Violence» мавзулари бўйича масофавий ўқув курсларини яратиш ва такомиллаштириш ишлари амалга оширилди. Уларнинг мазмуни илғор халқаро тажриба ва замонавий илмий ёндашувлар билан бойитилди.
Шунингдек, профессор томонидан криминология, виктимология, жиноятчилик назариялари ҳамда оилавий зўравонлик муаммоларига оид илмий адабиётлар Академия Ахборот-ресурс марказига тақдим этилди. Ушбу манбалар профессор-ўқитувчилар, тадқиқотчилар ва таълим олувчилар учун муҳим илмий ресурс бўлиб хизмат қилади.
Мазкур академик дастурнинг натижалари энди Академиянинг ўқув курслари, рақамли таълим муҳити ва илмий ресурсларида давом этади. Ҳуқуқни муҳофаза қилиш академияси етакчи хорижий олимлар ва амалиётчиларни таълим ҳамда илмий жараёнларга тизимли жалб этиш орқали илғор халқаро тажрибани ўқув жараёнига татбиқ этишга алоҳида эътибор қаратмоқда.