Қашқадарё вилояти Қарши шаҳридаги “Геолог” маҳалла фуқаролар йиғинида ёшлар ўртасида ҳуқуқбузарликлар, хусусан, кибержиноятларнинг олдини олишга қаратилган амалий семинар ўтказилди.
Тадбир Ўзбекистон Республикаси Ҳуқуқни муҳофаза қилиш академияси Рақамли криминалистика илмий-тадқиқот институти ходимлари томонидан Ўзбекистон Республикаси Президентининг 2026 йил 5 январдаги ПҚ–1 ва ПҚ–2-сон қарорлари ижроси доирасида ташкил этилди.
Учрашувда ёшларни интернет маконидаги хавф-хатарлардан ҳимоя қилиш, уларнинг ҳуқуқий ва рақамли саводхонлигини ошириш, кибергигиена кўникмаларини шакллантириш масалаларига алоҳида эътибор қаратилди.
Семинарнинг амалий қисмида виртуал маконда кенг тарқалаётган фирибгарлик схемалари ҳаётий мисоллар асосида тушунтирилди. Хусусан, шубҳали ҳаволалар орқали зарарли дастурларни тарқатиш, ижтимоий тармоқлардаги сохта аккаунтлардан фойдаланиш, молиявий пирамидаларга жалб қилиш ҳамда шахсий маълумотларни қўлга киритишга қаратилган ҳаракатларнинг хавфи ҳақида батафсил маълумот берилди.
Институт мутахассислари ёшларга аккаунтлар ва электрон тўлов воситаларини ҳимоя қилиш, ишончли пароллардан фойдаланиш, икки босқичли тасдиқлашни ёқиш, шубҳали хабар ва таклифларга танқидий ёндашиш, шахсий маълумотларни ошкор қилмаслик бўйича амалий тавсиялар бердилар.
Тадбирда рақамли муҳитдаги таҳдидларни ўз вақтида англаш ва хавфсизлик қоидаларига риоя қилиш кибержиноятлардан ҳимояланишнинг муҳим шарти экани таъкидланди.