Ўзбекистон Республикаси Ҳуқуқни муҳофаза қилиш академиясида Ички ишлар вазирлиги ҳузуридаги Тергов департаментининг ҳудудий тузилмаларига янги тайинланган терговчилар учун касбий қайта тайёрлаш курси якунланди. Якуний аттестациядан муваффақиятли ўтган тингловчиларга дипломлар топширилди.
Ўқув дастури терговчиларнинг мустақил процессуал қарорлар қабул қилиш, далиллар билан ишлаш, тергов ҳаракатларини режалаштириш ва ўтказиш, шунингдек, замонавий тергов методикаси ҳамда тактикасини амалиётда қўллаш кўникмаларини ривожлантиришга қаратилди.
Курс давомида тингловчилар жиноят ва жиноят-процессуал қонунчилигини қўллаш, далилларни тўплаш, текшириш ва баҳолаш, ахборот-коммуникация технологияларидан самарали фойдаланиш, инсон ҳуқуқ ва эркинликларининг кафолатларини таъминлаш масалалари бўйича назарий ва амалий билимларини мустаҳкамладилар.
Машғулотлар Академия профессор-ўқитувчилари ҳамда бошқа ҳуқуқни муҳофаза қилувчи органларнинг тажрибали амалиётчи ходимлари иштирокида амалий кейслар ва процессуал вазиятлар таҳлили асосида ташкил этилди.
Курс терговчиларнинг касбий тайёргарлигини мустаҳкамлаш, уларни масъулиятли ва самарали хизмат фаолиятига тайёрлашга хизмат қилди.