Ўзбекистон Республикаси Ҳуқуқни муҳофаза қилиш академиясида Адвокатлар палатаси билан ҳамкорликда адвокатлар ва терговчилар учун “Жиноят ва жиноят-процессуал қонунчилигини қўллаш масалалари” мавзусида семинар-тренинг ўтказилди.
Семинар-тренинг доирасида жиноятларни тўғри квалификация қилиш, далиллар билан ишлаш, шунингдек, суриштирув ва тергов жараёнларида ҳимоя ҳуқуқининг кафолатларини таъминлашга оид долзарб масалалар атрофлича муҳокама қилинди.
Ўқув дастури жиноятлар ва маъмурий ҳуқуқбузарликларни ўзаро фарқлаш, жумладан, маъмурий преюдиция билан боғлиқ ҳолатларга ҳуқуқий баҳо бериш, жиноятларни квалификация қилиш, далилларнинг мақбуллигини аниқлаш, суриштирув ва тергов босқичларида ҳимоя ҳуқуқини самарали таъминлаш бўйича тингловчиларнинг назарий билим ва амалий кўникмаларини ривожлантиришга қаратилди.
Машғулотлар Академия профессор-ўқитувчилари ҳамда тажрибали амалиётчи ходимлар иштирокида аниқ процессуал вазиятлар ва амалий кейслар таҳлили асосида ташкил этилди. Тингловчилар жиноят ва жиноят-процессуал қонунчилигини қўллаш, далилларни тўплаш, текшириш ва баҳолаш, ахборот-коммуникация технологияларидан самарали фойдаланиш, инсон ҳуқуқ ва эркинликлари кафолатларини таъминлаш масалалари бўйича билимларини мустаҳкамладилар.
Семинар-тренинг давомида ўтказилган баҳс-мунозара ва ўзаро муҳокамалар адвокатлар ҳамда терговчиларнинг касбий мулоқотини мустаҳкамлаш, ҳуқуқни қўллаш амалиётида учрайдиган мураккаб процессуал масалаларга нисбатан асосли ёндашувларни шакллантиришга хизмат қилди.
Шунингдек, иштирокчилар Академиянинг Рақамли криминалистика илмий-тадқиқот институти фаолияти билан яқиндан танишдилар. Тергов полигонлари, криминалистика ва бошқа махсус ўқув-имитация хоналарининг имкониятлари асосида улар замонавий криминалистик ёндашувлар хусусида фикр алмашдилар.
Семинар-тренинг якунларига кўра, тингловчиларга сертификатлар топширилди.