Журналнинг илк сонида коррупциянинг олдини олиш, коррупция учун жавобгарлик, жиноий даромадларни легаллаштиришга қарши курашиш, коррупцияга қарши таълим ва тадқиқотлар, шунингдек, коррупция ҳамда инсон ҳуқуқлари ўртасидаги боғлиқликка оид долзарб мавзулар қамраб олинган.
Мақолалар халқаро таҳрир ва тақризлаш амалиёти асосида саралаб олинди. Нашрда халқаро таҳрир ҳайъати, икки томонлама яширин тақризлаш тизими, DOI рақамли идентификатори, очиқ фойдаланиш тамойили, нашр этиш этикаси қоидалари ва плагиатга қарши назорат механизмлари жорий этилган.
Таҳрир ҳайъати таркибига Швеция, АҚШ, Покистон, Жанубий Африка, Словения, Қозоғистон, Нидерландия, Бангладеш, Мексика, Индонезия ва Ўзбекистоннинг етакчи олимлари киритилган. Бу журнални турли илмий мактаблар ва тажрибаларни бирлаштирувчи, мақолаларни халқаро академик мезонлар асосида баҳолашга хизмат қилувчи мулоқот майдонига айлантиради.
“Anti-Corruption Studies and Research” ҳуқуқ, иқтисодиёт, сиёсатшунослик, социология, халқаро муносабатлар ва давлат бошқаруви соҳалари кесимида коррупцияга қарши курашиш масалаларини комплекс ўрганишга қаратилган. Журналнинг асосий вазифаси – илмий далилларга таянган сиёсат ва амалий ечимлар ишлаб чиқилишини қўллаб-қувватлашдир.
Таҳририят журнал мазмуни ва нашр сифатини халқаро стандартлар асосида изчил такомиллаштириш, уни келгусида “Scopus” халқаро илмий маълумотлар базасида индексланадиган нуфузли журналлар қаторига киритиш учун зарур мезонларга мувофиқлаштиришни стратегик мақсад қилиб белгилаган.
Илк соннинг нашр этилиши Ҳуқуқни муҳофаза қилиш академияси учун коррупцияга қарши курашиш соҳасидаги миллий илмий изланишларни халқаро илмий муомалага киритиш, уларнинг долзарблиги ва амалий аҳамиятини кенг намоён этиш борасидаги муҳим натижадир.