Ишчи учрашувлар Грузия прокуратураси ва Квемо-Картли минтақавий прокуратураси, Грузия Ички ишлар вазирлигининг Инсон ҳуқуқларини ҳимоя қилиш департаменти, «112» жамоат хавфсизлиги маркази, Полиция академияси, Жиноятчилик профилактикаси, озодликдан маҳрум қилиш билан боғлиқ бўлмаган жазоларни ижро этиш ва пробация миллий агентлиги, Давлат ғамхўрлиги ва одам савдоси жабрланувчиларига ёрдам агентлиги, Грузия Халқ ҳимоячиси – Омбудсман аппарати ҳамда Иване Жавахишвили номидаги Тбилиси давлат университети юридик факультети вакиллари билан ўтказилди.
Мулоқотларда оилавий ва маиший зўравонликка қарши курашишнинг ҳуқуқий, ташкилий ва институционал механизмлари муҳокама қилинди. Хусусан, мурожаатларни қабул қилиш ва тезкор кўриб чиқиш, хавф даражасини баҳолаш, ҳимоя чораларини қўллаш, жабрланувчиларга ҳуқуқий, психологик ва ижтимоий ёрдам кўрсатиш, шунингдек, масъул тузилмалар фаолиятини ўзаро мувофиқлаштириш масалалари атрофлича ўрганилди.
Алоҳида эътибор яратилаётган платформа учун аҳамиятли бўлган рақамли ечимларга қаратилди. Бунда мурожаатларни электрон қабул қилиш, ҳуқуқбузарликларни ягона ахборот тизимида қайд этиш, хавф даражасини баҳолаш, масъул идоралар ўртасида тезкор ахборот алмашинувини таъминлаш, кўрсатилаётган ёрдам сифатини мониторинг қилиш ва маълумотлар хавфсизлигини кафолатлаш амалиёти таҳлил қилинди.
Ташриф якунлари бўйича олинган амалий хулосалар ишлаб чиқилаётган платформанинг функционал имкониятларини белгилаш, идоралараро ҳамкорлик механизмларини такомиллаштириш ҳамда жабрланувчиларни ҳимоя қилишга қаратилган чораларни тезкор ва узвий ташкил этишда муҳим аҳамият касб этади.