Учрашув доирасида Ўзбекистон Республикаси Мудофаа вазирлигининг Киберхавфсизлик департаменти ва Ўзбекистон Республикаси Ҳуқуқни муҳофаза қилиш академияси ўртасида ҳамкорлик меморандуми имзоланди.
Ҳужжат идоралараро ҳамкорликни янада ривожлантириш, ҳамкорликнинг ҳуқуқий асосларини мустаҳкамлаш, амалий тажриба алмашиш ва рақамли криминалистика соҳасида мутахассислар малакасини ошириш мақсадида имзоланди.
Меморандум рақамли криминалистикани ривожлантиришга қаратилган қўшма учрашувлар, семинарлар, ўқув машғулотларини ташкил этиш, лойиҳалар ва тадбирларни амалга ошириш, шунингдек, ушбу соҳадаги қонунчилик ва стандартларни такомиллаштириш бўйича таклифлар тайёрлашни назарда тутади.
Рақамли криминалистик экспертизаларнинг замонавий турлари бўйича мутахассислар малакасини ошириш, махсус криминалистик лабораториялар фаолиятини ташкил этиш бўйича тажриба алмашиш, қўшма суд экспертизалари ва тадқиқотлар ўтказиш, шунингдек, рақамли криминалистик экспертизаларни ўтказиш методикаларини ишлаб чиқиш ҳамкорликнинг устувор йўналишлари сифатида белгиланди.
Бундан ташқари, томонлар рақамли криминалистика бўйича халқаро курсларни ташкил этиш, томонлар ваколатига кирадиган масалалар бўйича илғор тажриба, ахборот ва маслаҳатлар алмашиш бўйича ҳамкорликни ривожлантириш ниятида.
Меморандумнинг имзоланиши рақамли криминалистика ва киберхавфсизлик соҳасида кадрлар, илмий-услубий ва эксперт салоҳиятини мустаҳкамлашда муҳим қадам бўлади, шунингдек, ахборот технологияларидан фойдаланган ҳолда содир этиладиган жиноятларга қарши курашиш самарадорлигини оширишга хизмат қилади.