Евгений Вячеславович Коленко ўз нутқида хотин-қизларнинг ҳуқуқни муҳофаза қилиш тизимидаги лидерлик ўрнини мустаҳкамлаш фақат уларнинг тизимдаги иштирокини кенгайтириш масаласи эмаслигини таъкидлади. Бу хизмат сифатини ошириш, жамоатчилик ишончини мустаҳкамлаш ва самарали бошқарув қарорларини қабул қилишнинг муҳим шартидир.
Академия бу йўналишда хотин-қизларнинг касбий ва раҳбарлик салоҳиятини ривожлантиришга алоҳида эътибор қаратмоқда. Мақсад – уларнинг тизимда нафақат малакали мутахассис, балки раҳбар, таҳлилчи ва мураббий сифатида ҳам мустаҳкам ўрин эгаллашини таъминлаш.
Халқаро экспертлар Кейт Мейнелл ва Монтсеррат Пина иштирокидаги машғулотларда стратегик фикрлаш, самарали мулоқот, жамоани бошқариш, мураккаб вазиятларда қарор қабул қилиш ва профессионал алоқаларни ривожлантиришнинг амалий ёндашувлари муҳокама қилинди.
Тренинг Академия ходималари учун илғор халқаро тажрибани ўрганиш билан бирга, жамоа билан ишлаш, масъулиятли қарор қабул қилиш ва касбий мулоқотни ривожлантиришга доир амалий воситаларни ўзлаштириш имконини берди. Уларни касбий фаолиятда қўллаш жамоада ўзаро қўллаб-қувватлаш ва масъулиятли раҳбарлик маданиятини мустаҳкамлашга хизмат қилади.