Ўзбекистон Республикаси Ҳуқуқни муҳофаза қилиш академияси АТ «Алоқабанк» ходимлари учун коррупцияга, жиноий даромадларни легаллаштиришга ва терроризмни молиялаштиришга қарши курашиш масалалари бўйича икки кунлик ўқув семинарини ўтказди.
Ўқув давомида миллий қонунчилик ва ФАТФ стандартлари талаблари, манфаатлар тўқнашувининг олдини олиш, мижозларни лозим даражада текшириш, мақсадли молиявий санкцияларни қўллаш ҳамда шубҳали операцияларни аниқлаш масалалари кўриб чиқилди.
Молиявий мониторинг, комплаенс-хатарларни бошқариш ва ички назоратни такомиллаштиришнинг амалий жиҳатларига алоҳида эътибор қаратилди. Банк амалиётидан олинган мисоллар асосида иштирокчилар хатарларни аниқлаш ва назорат тартиб-таомиллари самарадорлигини ошириш усулларини кўриб чиқдилар.
Машғулотларни Ўзбекистон Республикаси Ҳуқуқни муҳофаза қилиш академияси профессор-ўқитувчилари, шунингдек, Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти ва Ўзбекистон Республикаси Марказий банки мутахассислари олиб бордилар.
Ўқув якунида иштирокчиларга Ўзбекистон Республикаси Ҳуқуқни муҳофаза қилиш академиясининг сертификатлари топширилди.