Ўзбекистон Республикаси Ҳуқуқни муҳофаза қилиш академиясида Ички ишлар вазирлиги ҳузуридаги Тергов департаментининг ҳудудий бўлинмаларига янги тайинланган терговчилар учун касбий қайта тайёрлаш курслари изчил ташкил этилмоқда. Ўқув жараёни уларда терговни мустақил режалаштириш ва олиб бориш, далиллар билан малакали ишлаш ҳамда қонуний ва асосли процессуал қарорлар қабул қилиш учун зарур билим ва кўникмаларни шакллантиришга қаратилган.
Курслар Ўзбекистон Республикаси Президентининг 2022 йил 28 ноябрдаги “Жиноятларни тергов қилиш соҳасида малакали кадрларни тайёрлашнинг сифат жиҳатидан янги тизимини жорий этиш тўғрисида”ги ПФ–257-сон Фармонида белгиланган вазифалар ижроси доирасида ўтказилмоқда. Бугунга қадар 288 соатлик касбий қайта тайёрлаш дастурини 130 нафардан зиёд тингловчи муваффақиятли якунлади.
Ўқув дастури жиноят ва жиноят-процессуал қонунчиликни тўғри қўллаш, далилларни тўплаш, текшириш ва баҳолаш, терговни режалаштириш ва тергов ҳаракатларини ўтказиш, рақамли технологиялардан фойдаланиш, инсон ҳуқуқ ва эркинликларини таъминлаш, касбий этика ҳамда хизмат интизоми каби муҳим йўналишларни қамраб олади.
Машғулотларга Академия профессор-ўқитувчилари билан бир қаторда ҳуқуқни муҳофаза қилувчи органларнинг кўп йиллик амалий тажрибага эга мутахассислари ҳам жалб этилмоқда. Назария ва амалиёт уйғунлиги тингловчиларга олган билимларини тергов амалиётида учрайдиган аниқ вазиятлар мисолида мустаҳкамлаш имконини беради.
Ҳар бир курс якунида тингловчиларнинг билим ва амалий кўникмалари якуний аттестация орқали баҳоланади. Синовлардан муваффақиятли ўтган тингловчиларга Академия томонидан касбий қайта тайёрлаш тўғрисидаги дипломлар топширилади.
Айни пайтда навбатдаги гуруҳларда ўқув жараёни давом этмоқда. Янги тайинланган терговчиларни тизимли касбий қайта тайёрлаш тергов бўлинмаларининг кадрлар салоҳиятини мустаҳкамлашга, жиноятларни қонуний, холис ва пухта тергов қилиш амалиётини таъминлашга хизмат қилади.