Ўзбекистон Республикаси Ҳуқуқни муҳофаза қилиш академияси рақамли криминалистика соҳасида тажриба-конструкторлик лойиҳаларини ишлаб чиқиш ва амалга ошириш бўйича мутахассисни вақтинчалик асосда жалб қилиш учун танлов эълон қилади.
Мутахассиснинг мажбуриятлари:
– Академия раҳбариятининг топшириғига асосан рақамли криминалистика соҳасида тажриба-конструкторлик лойиҳаларини ишлаб чиқиш ва амалга ошириш;
– шартномага илова қилинган бажариладиган ишлар календарь режасига мувофиқ рақамли далилларни аниқлаш, қайд этиш, олиб қўйиш, сақлаш, тиклаш ва тадқиқ қилишга мўлжалланган дастурий ҳамда техник воситаларни ишлаб чиқиш;
– тажриба-конструкторлик ишларига оид техник топшириқлар, лойиҳа-конструкторлик ҳужжатлари, техник тавсифлар, синов дастурлари, йўриқномалар ва ҳисоботларни тайёрлаш;
– амалга оширилган ишлар бўйича техник топшириқлар, лойиҳа-конструкторлик ҳужжатлари, йўриқномалар ва ҳисоботларни тайёрлаш, шунингдек, ишлаб чиқилган ечимларни Академия фаолиятига жорий этиш бўйича таклифлар киритиш.
Номзодга қўйиладиган талаблар:
– мутахассислик бўйича малакасини тасдиқловчи ҳужжатлар — диплом, сертификат ёки бошқа тегишли ҳужжатларга эга бўлиш;
– рақамли криминалистика, ахборот технологиялари, дастурий-аппарат воситалари ёки тажриба-конструкторлик ишлари соҳасида камида икки йиллик иш тажрибасига эга бўлиш;
– компьютер қурилмалари, маълумот ташувчилари, операцион тизимлар, тармоқ технологиялари ва ахборот хавфсизлиги асосларини билиш;
– ўзбек ва рус тилларини яхши билиш. Инглиз тилини билиш номзод учун устунлик беради.
Мазкур иш 6 (олти) ой муддатга белгиланган бўлиб, кейинчалик Академия эҳтиёжидан ва мутахассис фаолияти натижаларидан келиб чиққан ҳолда шартнома муддати узайтирилиши ёки белгиланган тартибда Академияга ишга қабул қилиниши мумкин.
Бажарилган иш учун тўлов миқдори тарафлар келишуви билан белгиланади ва талабгорга бажарилган иш натижасига кўра тўланади.
Қўшимча талаблар: ташаббускорлик, масъулиятлилик, техник ва таҳлилий фикрлаш қобилияти, жамоада ишлай олиш, янги технологияларни тез ўзлаштириш ҳамда берилган топшириқларни сифатли ва ўз вақтида бажариш.
Иш вақти: ҳафтасига 5 кунлик иш режимида 40 соатни ташкил этади.
Талабгор Академия Кадрлар бўлимига фуқаролик паспорти ёки ID-картаси билан шахсан мурожаат қилиб, тегишли ҳужжатлар — шахсини тасдиқловчи ҳужжат, объективка, олий маълумот тўғрисидаги диплом, сертификат, меҳнат дафтарчаси ёки электрон меҳнат дафтарчасидан кўчирма, ЖШШИР маълумотномаси, мавжуд малака сертификатлари ҳамда амалга оширган лойиҳалари ҳақидаги маълумотларни тақдим этиши лозим.
Тақдим этилган ҳужжатлар ўрганиб чиқилгандан сўнг, заруратга кўра, номзод билан комиссия таркибида суҳбат ва унинг касбий-амалий кўникмаларини баҳолаш жараёни ўтказилади.
Ҳужжатлар 2026 йил 24 июлга қадар қабул қилинади.
Телефон: 71 202-04-96 (1977)