Ўзбекистон Республикаси Ҳуқуқни муҳофаза қилиш академиясида уюшган жиноятчилик ва терроризмга қарши курашиш соҳасида ҳуқуқни муҳофаза қилувчи органлар ҳамда жиноий одил судлов тизимида хотин-қизлар иштирокини кенгайтиришга бағишланган икки кунлик халқаро тренинг якунланди. Дастур якунида иштирокчиларга сертификатлар топширилди.
«Ўзбекистон Республикасида уюшган жиноятчилик ва терроризмга қарши курашиш доирасида ҳуқуқни муҳофаза қилиш фаолияти ва жиноий одил судлов тизимида хотин-қизлар ролини ошириш» мавзусидаги тренинг Европа Иттифоқи ва CIVIPOL лойиҳаси кўмагида EU-ACT дастури доирасида ташкил этилди.
Тадбир ҳуқуқни муҳофаза қилувчи ва суд органлари, халқаро ташкилотлар ҳамда экспертлар ҳамжамияти вакилларини бирлаштирди. Унинг очилиш маросимида Ўзбекистон Республикаси Бош прокурори ўринбосари Светлана Артикова, Ўзбекистон Республикаси Ҳуқуқни муҳофаза қилиш академияси раҳбарининг биринчи ўринбосари Евгений Коленко, Европа Иттифоқининг Ўзбекистондаги ваколатхонаси муваққат ишлар вакили ҳамда сиёсий масалалар ва ахборот бўлими раҳбари Ренат Пробель, шунингдек, EU-ACT дастурининг етакчи эксперти Маргарита де ла Барга сўзга чиқди.
Экспертлик ва амалий сессиялар давомида ҳуқуқни муҳофаза қилиш ва жиноий одил судлов тизимида хотин-қизлар ролини кенгайтириш, уларнинг касбий ва етакчилик салоҳиятини мустаҳкамлаш, хизматда ўсиши учун тенг имкониятлар яратиш ҳамда кадрлар сиёсатини такомиллаштиришга доир замонавий ёндашувлар кўриб чиқилди.
Уюшган жиноятчилик ва терроризм билан боғлиқ жиноятларнинг олдини олиш, уларни аниқлаш ва тергов қилишда хотин-қизлар иштирокини кучайтириш, шунингдек, уларнинг касбий ривожланишига тўсқинлик қилиши мумкин бўлган ҳуқуқий ва ташкилий омилларга алоҳида эътибор қаратилди.
Маргарита де ла Барга Европа прокуратура органлари ривожланишининг замонавий тенденциялари ва жиноий таъқиб жараёнига гендер ёндашувини жорий этиш амалиётини тақдим қилди. Иштирокчилар хорижий тажрибани миллий шароитларга мослаштириш имкониятларини муҳокама қилди.
Академия вакили гендер масалаларини прокурорлик ва бошқа ҳуқуқни муҳофаза қилувчи органлар кадрларини дастлабки ҳамда узлуксиз касбий тайёрлаш дастурларига киритишга доир ёндашувлар билан таништирди. Ходимларда амалий кўникмаларни шакллантириш ва жиноят судловидаги гендер жиҳатлари бўйича хабардорликни ошириш масалалари кўриб чиқилди.
Тренингнинг интерактив формати иштирокчиларга касбий тажриба алмашиш, самарали амалиётларни тақдим этиш ҳамда уюшган жиноятчилик ва терроризмга қарши курашишда хотин-қизлар иштирокини янада кенгайтиришга доир таклифларни ишлаб чиқиш имконини берди.
Икки кунлик дастур якунида иштирокчиларга сертификатлар топширилди.