Ўзбекистон Республикаси Ҳуқуқни муҳофаза қилиш академиясида 2026/2027 ўқув йили учун бакалавриатнинг «60420100 – Юриспруденция» таълим йўналиши бўйича иккинчи ва ундан кейинги олий таълимга қабул давом этмоқда. Таълим давлат тилида, масофавий шаклда ва тўлов-контракт асосида амалга оширилади.
Иккинчи ва ундан кейинги олий таълим бўйича қабул параметрлари олий таълим ташкилотининг илмий-педагогик салоҳияти ва моддий-техник базаси ҳисобга олинган ҳолда унинг кенгаши томонидан белгиланади.
Шунга мувофиқ, Ўзбекистон Республикаси Ҳуқуқни муҳофаза қилиш академияси Мувофиқлаштириш-васийлик кенгашининг 2-сонли йиғилиши баёни билан иккинчи ва ундан кейинги олий таълимга қабул қилиш тартиби белгиланди.
Иккинчи ва ундан кейинги олий таълим олиш истагини билдирган талабгорлар Олий таълим, фан ва инновациялар вазирлиги ҳузуридаги Рақамли таълим ва сунъий интеллектни ривожлантириш марказининг махсус электрон платформаси – my.edu.uz орқали 10 августга қадар (шу куни ҳам) рўйхатдан ўтишлари лозим.
Кириш имтиҳонлари Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги томонидан «Ҳуқуқшунослик» ҳамда «Она тили ва адабиёт» фанларидан тест синовлари шаклида ўтказилади.
Тест синовларида иштирок этиш учун барча талабгорлардан базавий ҳисоблаш миқдорининг ярим баравари миқдорида тўлов ундирилади.