Ўзбекистон Республикаси Ҳуқуқни муҳофаза қилиш академияси ҳамда Польша Республикасининг Гданьск университети ўртасидаги ҳамкорлик доирасида Академиянинг 2–3-курс талабалари учун академик мобиллик дастурига қабул эълон қилинди. Битирувчи курс талабалари танловда иштирок этмайди.
Дастур бир семестрга мўлжалланган бўлиб, 2026/2027 ўқув йилининг кузги семестрини хорижий ҳамкор университетда грант ёки тўлов-контракт асосида ўқиш имконини беради.
Танловда иштирок этиш учун талабгорларнинг:
– ўртача ўзлаштириш кўрсаткичи (GPA) камида 80 фоиз бўлиши;
– инглиз тилини билиш даражаси IELTS 6,0 ёки ундан юқори натижа билан тасдиқланган бўлиши лозим.
Дастурда иштирок этиш истагини билдирган талабалар қуйидаги ҳужжатларни 2026 йил 31 июлга қадар Офис-регистратор марказига тақдим этишлари керак:
– алмашинув дастурида иштирок этиш мақсади ва режалари баён этилган, мустақил тайёрланган ҳамда сунъий интеллект воситаларидан фойдаланилмаган инглиз тилидаги мотивацион хат – 500 сўзгача;
– академик транскрипт нусхаси;
– хорижга чиқиш паспортининг шахсий маълумотлар кўрсатилган саҳифаси нусхаси;
– инглиз тилини билиш даражасини тасдиқловчи IELTS сертификати;
– ижтимоий фаолликни тасдиқловчи сертификатлар ва бошқа ҳужжатлар – мавжуд бўлган тақдирда.
Онлайн тадбирларда иштирок этганлик учун берилган сертификатлар ва тавсияномалар қабул қилинмайди.
Танлов ва суҳбат натижаларига кўра, алоҳида иқтидорли талабаларга Гданьск университетида ўқиш тўловисиз таҳсил олиш имконияти берилади.
Дастурда тўлов асосида иштирок этувчи талабгорлар Гданьск университетига 1 800 евро миқдорида ўқиш тўловини амалга оширадилар.
Гданьск университетида таҳсил олиш билан боғлиқ бошқа барча харажатлар, жумладан, транспорт, виза, суғурта, ётоқхона ва яшаш харажатлари талабанинг ўз маблағлари ҳисобидан қопланади.
Академияда тўлов-контракт асосида таҳсил олаётган талабалар Академия билан тузилган шартномага мувофиқ контракт тўловларини белгиланган тартибда амалга оширадилар.
Батафсил маълумот учун: s.ruzieva@proacademy.uz