Трансмиллий жиноятчилик кўламининг кенгайиши хорижий давлатлардан далилларни тезкор олиш, жиноий активларни қидириш ва қайтариш, шунингдек, турли давлатларнинг ваколатли органлари ўртасида самарали ҳамкорликни таъминлашни тобора долзарб вазифага айлантирмоқда.
Мазкур масалалар Ўзбекистон Республикаси Ҳуқуқни муҳофаза қилиш академиясида ўтказилган ўзаро ҳуқуқий ёрдам ва халқаро суд ҳамкорлигига бағишланган халқаро амалий семинарнинг асосий муҳокама мавзуларини ташкил этди. Тадбир Европа Иттифоқи ва CIVIPOL кўмагида EU-ACT дастури доирасида ташкил этилди.
Семинарда прокуратура органлари, Ҳуқуқни муҳофаза қилиш академияси, Ички ишлар вазирлиги ва Давлат хавфсизлик хизмати вакиллари, шунингдек, Франция ва Испаниядан таклиф этилган халқаро экспертлар иштирок этди.
Дастур доирасида ўзаро ҳуқуқий ёрдам тўғрисидаги сўровларни тайёрлаш, экстрадиция, жиноий активларни қидириш ва қайтариш, банк маълумотлари ҳамда рақамли далилларни олиш билан боғлиқ ҳуқуқий ва амалий масалалар кўриб чиқилди.
Машғулотлар амалий форматда ташкил этилиб, иштирокчилар халқаро суд ҳамкорлиги жараёнида учрайдиган типик муаммоларни таҳлил қилди, махсус топшириқларни бажарди ва уларни ҳал этиш бўйича тажриба алмашди.
Муҳокамалар давомида ўзаро ҳуқуқий ёрдам тўғрисидаги сўровларнинг сифатли ва аниқ тайёрланиши, уларни ваколатли хорижий органларга ўз вақтида юбориш, шунингдек, банк ва рақамли маълумотларни олишда самарали ҳамкорликни таъминлаш масалаларига алоҳида эътибор қаратилди.
Халқаро экспертлар Франция ва Испания тажрибаси мисолида давлатлар ўртасидаги ҳуқуқий ҳамкорлик механизмлари, экстрадиция ва жиноий активларни қайтариш жараёнида қўлланиладиган амалий ёндашувлар билан ўртоқлашди.
Семинар иштирокчиларга халқаро-ҳуқуқий ҳамкорлик соҳасидаги билим ва амалий кўникмаларини мустаҳкамлаш, мавжуд муаммолар юзасидан фикр алмашиш ҳамда ваколатли органлар ўртасидаги ҳамкорлик самарадорлигини оширишга қаратилган таклифларни ишлаб чиқиш имконини берди.
Тадбир якунида ўзаро ҳуқуқий ёрдам ва халқаро суд ҳамкорлиги механизмларини янада такомиллаштириш бўйича таклифлар ишлаб чиқилди. Семинар иштирокчиларига сертификатлар топширилди.