Ўзбекистон Республикаси Ҳуқуқни муҳофаза қилиш академияси бакалавриатининг «Тергов фаолияти» йўналиши бўйича илк битирувчилари ҳаётида муҳим воқеа юз берди. Ички ишлар органларида хизмат фаолиятини бошлаётган ёш мутахассисларга биринчи махсус – «лейтенант» унвони берилди ҳамда улар ички ишлар органлари ходимининг хизмат қасамёдини қабул қилди.
Тантанали маросимда Ўзбекистон Республикаси ички ишлар вазири, Бош прокурор ўринбосари, шунингдек ҳуқуқни муҳофаза қилувчи органлар, ИИВ академияси ҳамда Ҳуқуқни муҳофаза қилиш академияси раҳбар ва ходимлари, битирувчиларнинг ота-оналари иштирок этдилар.
Сўзга чиққанлар ёш офицерларни касбий ҳаётидаги муҳим ва масъулиятли босқич билан табриклаб, биринчи махсус унвон ва хизмат қасамёди давлат ҳамда халқ томонидан билдирилган юксак ишонч ифодаси эканини таъкидлади.
Битирувчиларни қонунга сўзсиз риоя қилиш, инсон қадри, фуқароларнинг ҳуқуқ ва қонуний манфаатларини ишончли ҳимоя этиш, ҳар қандай вазиятда ҳалоллик, матонат ва юксак масъулият билан хизмат қилишга чақирилди. Ёш офицерларнинг ҳар бир қарори ва хатти-ҳаракатларида қонунийлик, адолат ва халқ манфаатлари устувор бўлиши лозимлиги қайд этилди.
Маросимнинг энг тантанали ва ҳаяжонли лаҳзасида битирувчиларга биринчи махсус – «лейтенант» унвони топширилди. Мазкур унвон уларнинг офицер сифатидаги касбий йўлини бошлаб бериши билан бирга, хизмат интизомига қатъий риоя этиш, қабул қилинадиган ҳар бир қарор ва амалга ошириладиган ҳар бир ҳаракат учун шахсий жавобгарликни ҳам юклайди.
Шундан сўнг ёш офицерлар ички ишлар органлари ходимининг хизмат қасамёдини қабул қилиб, Ватан ва халққа садоқат билан хизмат қилиш, Ўзбекистон Республикаси Конституцияси ва қонунларига қатъий риоя этиш, фуқароларнинг ҳуқуқлари, эркинликлари ва қонуний манфаатларини ҳимоя қилиш, хизмат бурчини ҳалол ва виждонан бажаришга аҳд берди.
Биринчи махсус унвоннинг берилиши битирувчиларнинг офицерлар сафига қадам қўйганини, хизмат қасамёдини қабул қилиши эса Ватан, халқ ва қонун олдидаги юксак масъулиятни зиммасига олганини ифода этади.
Академия жамоаси илк битирувчилар ўз фаолиятида қонунийлик, адолат, ҳалоллик ва инсон қадрини ҳурмат қилиш тамойилларига содиқ қолиб, мамлакатимизда ҳуқуқ-тартибот, жамоат хавфсизлиги ва халқ осойишталигини таъминлашга муносиб ҳисса қўшишига ишонч билдиради.
Ёш офицерларга касбий муваффақиятлар, хизматда матонат ва сабр-тоқат, қасамёд ҳамда қонунга садоқат, шунингдек, давлат ва халқ ишончини муносиб оқлашни тилаймиз.