Ўзбекистон Республикаси Ҳуқуқни муҳофаза қилиш академияси Санкт-Петербургда ўтказилган «ICT-Crime 2026» халқаро конференциясида рақамли криминалистика мутахассисларини тайёрлаш ҳамда ахборот-коммуникация технологияларидан фойдаланиб содир этиладиган жиноятларни тергов қилишга доир миллий тажрибани тақдим этди.
Анжуман 29 давлат ҳамда бешта халқаро ташкилот – БМТ, Осиёда ҳамкорлик ва ишонч чоралари бўйича кенгаш, ШҲТ, МДҲ ва Коллектив хавфсизлик шартномаси ташкилоти вакилларини, шунингдек давлат идоралари, илмий ва эксперт доиралар мутахассисларини бир майдонга жамлади. Конференцияда АКТдан фойдаланиб содир этиладиган жиноятларни аниқлаш, олдини олиш, барҳам бериш ва тергов қилиш, ушбу соҳада халқаро ҳамкорлик ва ҳуқуқий тартибга солиш механизмларини такомиллаштириш, шунингдек шахсий маълумотлардан ноқонуний фойдаланиш билан боғлиқ таҳдидларга қарши курашиш масалалари муҳокама қилинди.
Академия номидан Рақамли криминалистика илмий-тадқиқот институти бошлиғи Сардорбек Урозбаев ҳамда Институтнинг Ихтисослаштирилган рақамли тадқиқотлар маркази бошлиғи Хагани Гаджиев конференциянинг «АКТдан фойдаланиб содир этиладиган жиноятларга қарши курашишнинг илғор амалиётлари» мавзусидаги сессиясида маърузалар билан иштирок этди.
Сардорбек Урозбаев ўз маърузасида Академияда АКТ соҳасидаги жиноятларга қарши курашиш учун мутахассислар тайёрлаш тажрибасини, рақамли криминалистика бўйича касбий компетенцияларни шакллантиришга қаратилган таълим ёндашувларини тақдим этди.
Хагани Гаджиев эса АКТдан фойдаланиб содир этиладиган жиноятларни тергов қилишнинг илғор амалиётларига тўхталиб, Институтнинг экспертлик ва тадқиқот фаолиятида қўлланилаётган амалий методика ҳамда ёндашувлар ҳақида сўз юритди.
Тақдим этилган материаллар Академияда рақамли криминалистика йўналишида таълим, илмий тадқиқот ва экспертлик амалиётининг ўзаро уйғун йўлга қўйилганини намоён этди. Институт рақамли далилларни аниқлаш, қайд этиш, олиш ва тадқиқ қилиш, компьютер-техник, мобил қурилмалар, тармоқлар, катта ҳажмдаги маълумотлар ва маълумотлар базалари бўйича экспертизалар ўтказиш йўналишларида фаолият юритади.
Конференциядаги иштирок Академиянинг рақамли криминалистика соҳасидаги илмий ва амалий салоҳиятини халқаро майдонда намойиш этиш, хорижий ҳуқуқни муҳофаза қилувчи ҳамда эксперт тузилмалари билан касбий алоқаларни кенгайтириш, илғор тажрибаларни ўрганиш ва келгуси ҳамкорлик йўналишларини белгилашга хизмат қилди.