Ўзбекистон Республикаси Ҳуқуқни муҳофаза қилиш академияси томонидан Бош прокуратура ҳузуридаги Иқтисодий жиноятларга қарши курашиш департаменти ва Марказий банк билан ҳамкорликда "Халқ банки" АТБ ички назорат бўлинмалари ходимлари учун малака ошириш семинари ўтказилди.
Семинар жиноий фаолиятдан олинган даромадларни легаллаштириш ва терроризмни молиялаштиришга қарши курашиш соҳасидаги миллий қонунчилик талаблари ҳамда ФАТФ халқаро стандартларини банк амалиётида самарали қўллаш масалаларига бағишланди.
Академия профессор-ўқитувчилари, Марказий банк ва Иқтисодий жиноятларга қарши курашиш департаменти мутахассислари иштирокида молиявий хавфларни аниқлаш ва баҳолаш, мижозларни лозим даражада ўрганиш, манфаатлар тўқнашувининг олдини олиш, санкциявий чекловларга риоя этиш ҳамда шубҳали операцияларни аниқлаш мезонлари кўриб чиқилди.
Реал кейслар асосида банк амалиётида учраётган муаммоли ҳолатлар, уларни ўз вақтида аниқлаш ва бартараф этиш механизмлари таҳлил қилинди. Таваккалчиликка асосланган ёндашувни қўллаш ва ички назорат жараёнларини такомиллаштиришга доир амалий тавсиялар юзасидан фикр алмашилди.
Очиқ мулоқот ва савол-жавоб шаклида ўтказилган машғулотлар иштирокчиларнинг молиявий хавфларни баҳолаш, шубҳали операцияларни таҳлил қилиш, манфаатлар тўқнашувининг олдини олиш ҳамда самарали ички назоратни ташкил этиш бўйича амалий кўникмаларини мустаҳкамлашга хизмат қилди.
Мазкур семинар банк тизимида қонунийлик ва молиявий шаффофликни таъминлаш, ички назорат самарадорлигини ошириш ҳамда комплаенс маданиятини юксалтиришга қаратилган ҳамкорликнинг амалий ифодаси бўлди.