Ўзбекистон Республикаси Ҳуқуқни муҳофаза қилиш академияси томонидан Бош прокуратура ҳузуридаги Иқтисодий жиноятларга қарши курашиш департаменти ҳамда Марказий банк билан ҳамкорликда ТИФ Миллий банки ички назорат тизими ходимлари учун навбатдаги малака ошириш семинари ташкил этилди. Тадбир жиноий даромадларни легаллаштириш ва терроризмни молиялаштиришга қарши курашишда банк ички назорати самарадорлигини оширишга қаратилди.
Семинар дастуридан миллий қонунчилик талаблари, ФАТФнинг халқаро стандартлари ва тавсиялари, банк операциялари билан боғлиқ молиявий хатарларни ўз вақтида аниқлаш, баҳолаш ва бошқариш, рискка асосланган ёндашувни қўллаш ҳамда мижозларни лозим даражада ўрганиш масалалари ўрин олди. Манфаатлар тўқнашувининг олдини олиш, санкциялар билан боғлиқ чекловларга риоя этиш, шубҳали молиявий операцияларни аниқлаш ва уларга ҳуқуқий баҳо бериш мезонларига алоҳида эътибор қаратилди.
Амалий кейслар асосида банк фаолиятида юзага келиши мумкин бўлган хавф омиллари ва муаммоли вазиятлар таҳлил қилиниб, уларнинг олдини олиш ҳамда эҳтимолий салбий оқибатларни камайтириш чоралари муҳокама этилди. Академия профессор ва ўқитувчилари, Марказий банк ҳамда Департамент мутахассислари иштирокида интерактив шаклда ўтказилган машғулотларда илғор миллий ва халқаро тажриба, шунингдек, ички назоратни самарали ташкил этиш механизмлари юзасидан фикр алмашилди.
Семинар якунида иштирокчиларнинг манфаатлар тўқнашувини аниқлаш ва бошқариш, молиявий хатарларни баҳолаш, шубҳали операцияларни таҳлил қилиш ҳамда зарур чораларни белгилаш бўйича амалий кўникмалари мустаҳкамланди. Олинган билим ва кўникмалар банкда комплаенс маданиятини ривожлантириш, ички назорат самарадорлигини ошириш, жиноий даромадларни легаллаштириш ва терроризмни молиялаштириш билан боғлиқ хатарларни камайтиришга хизмат қилади.