Ҳуқуқни муҳофаза қилиш академиясида банклар, тўлов ва суғурта ташкилотларининг ички назорат ва комплаенс бўлинмалари ходимлари учун икки кунлик ўқув-амалий семинар ўтказилди. Академия томонидан Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти ва Марказий банк билан ҳамкорликда ташкил этилган машғулотлар жиноий фаолиятдан олинган даромадларни легаллаштириш ва терроризмни молиялаштиришга қарши курашишда рискка асосланган ёндашувни амалда қўллашга қаратилди.
Семинарда «Ипак Йўли», «Трастбанк», «Asia Alliance Bank», «TBC Bank» ва «Hamkorbank» банкларининг ички назорат ва комплаенс бўлинмалари ходимлари, шунингдек, «PAYME» АЖ тўлов ташкилоти ҳамда «TBC SUG‘URTA» АЖ суғурта ташкилоти вакиллари иштирок этди. Молия бозорининг турли сегментлари вакиллари иштирок этгани молиявий мониторинг масалаларини банк, тўлов ва суғурта хизматларининг ўзига хос хусусиятларини инобатга олган ҳолда кўриб чиқиш имконини берди.
Ўқув дастури миллий қонунчилик талаблари, ФАТФнинг халқаро стандартлари ва тавсиялари, рискка асосланган ёндашув, мижозларни лозим даражада ўрганиш ҳамда молиявий операциялар билан боғлиқ хатарларни аниқлаш, баҳолаш ва бошқариш масалаларини қамраб олди. Шубҳали операцияларни аниқлаш, юқори хавф омилларини белгилаш, манфаатлар тўқнашувининг олдини олиш, белгиланган чекловлар ва санкцияларга доир талабларга риоя қилиш, молиявий операцияларга ҳуқуқий баҳо бериш ҳамда тегишли чораларни белгилашга алоҳида эътибор қаратилди. Амалий кейслар асосида молия ташкилотлари фаолиятида учрайдиган одатий ва мураккаб вазиятлар, мижозлар хатти-ҳаракатлари ва операциялардаги юқори хавф аломатлари таҳлил қилиниб, аниқланган хатарларни камайтириш механизмлари муҳокама этилди.
Машғулотлар Академия профессор-ўқитувчилари, Марказий банк ва Департамент мутахассислари иштирокида интерактив шаклда ўтказилди. Иштирокчилар молиявий мониторинг соҳасидаги долзарб тенденцияларни муҳокама қилиб, ички назоратни ташкил этиш бўйича илғор миллий ва халқаро тажриба алмашдилар. Семинар якунида уларнинг молиявий хатарларни баҳолаш, шубҳали операцияларни аниқлаш, манфаатлар тўқнашувини бошқариш, рискка асосланган ёндашувни қўллаш ва зарур чораларни белгилаш бўйича амалий кўникмалари мустаҳкамланди.