Ҳуқуқни муҳофаза қилиш академиясида прокуратура органларида терговчи лавозимига қабул қилинган бакалавриат битирувчилари учун махсус ўқув курси якунланди. Курс Академияда эгалланган касбий билим ва кўникмаларни прокуратура органларида дастлабки терговни ташкил этиш ва олиб боришнинг ўзига хос талаблари асосида чуқурлаштиришга қаратилди.
Дастур доирасида дастлабки терговни ташкил этиш, тергов ҳаракатларини ўтказиш тактикаси, процессуал мажбурлов чораларини қўллаш ҳамда айрим турдаги жиноятларни тергов қилиш методикаси бўйича чуқурлаштирилган машғулотлар ўтказилди.
Тингловчилар рақамли криминалистика, OSINT – очиқ манбалардан маълумот тўплаш ва таҳлил қилиш, блокчейн технологиялари соҳасида, шунингдек, полиграф ва махсус ахборот тизимлари билан ишлаш бўйича амалий кўникмаларини ривожлантирди.
Назарий билимларни амалиётда мустаҳкамлаш мақсадида Тошкент шаҳар прокуратурасининг ўта оғир жиноятларни тергов қилиш бўлими, Ички ишлар вазирлигининг махсус полигони ҳамда жиноят ишлари бўйича Юнусобод туман судида сайёр семинар ва машғулотлар ташкил этилди.
Касбий тайёргарлик билан бир қаторда, хизмат этикаси, Ахлоқ кодекси талабларига риоя қилиш, стресс ва низоли вазиятларни бошқариш, суд нотиқлиги ҳамда касбий ёзма нутқ маданиятини ривожлантиришга алоҳида эътибор қаратилди.
Курс якунида 31 нафар ёш терговчига сертификатлар тантанали равишда топширилди. Улар хизмат фаолиятини бошлаш учун белгиланган ҳудудий прокуратура органларига йўлланди.