Бугун Бош прокуратурада Ўзбекистон Республикаси Ҳуқуқни муҳофаза қилиш академияси бакалавриатининг “Тергов фаолияти” йўналишини тамомлаган илк битирувчиларни ҳудудий прокуратура органларининг тергов тармоқларида хизмат ўташ жойларига тақсимлашга бағишланган тадбир бўлиб ўтди. Унда Бош прокуратура раҳбарияти, тергов ва кадрлар тармоқлари раҳбарлари, прокуратура фахрийлари, Академия ходимлари ҳамда битирувчилар иштирок этди.
Мазкур битирувчилар Ўзбекистон Республикаси Президентининг 2022 йил 28 ноябрдаги ПФ–257-сон Фармони асосида жорий этилган, дастлабки тергов ва суриштирув органлари учун терговчиларни ягона ёндашув асосида тайёрлаш тизими бўйича таҳсил олган илк мутахассислардир. Таълим жараёнида назарий тайёргарликни ҳуқуқни қўллаш амалиёти билан уйғунлаштириш, жиноят ишлари бўйича мустақил иш юритиш кўникмаларини ривожлантириш ҳамда инсон ҳуқуқ ва эркинликларига сўзсиз риоя этиш маданиятини шакллантиришга устувор аҳамият қаратилди.
Тадбирда битирувчиларнинг жиноятларни квалификация қилиш, рақамли криминалистика воситаларидан фойдаланиш, процессуал ҳужжатлар билан ишлаш ва терговнинг замонавий методика ҳамда тактикасини қўллаш бўйича эгаллаган кўникмалари, шунингдек, стрессга бардошлилиги алоҳида қайд этилди. Бош прокуратура раҳбарияти уларга прокуратура органларининг тергов тармоқлари олдида турган асосий вазифалар, хизмат фаолиятида эътибор қаратилиши лозим бўлган устувор йўналишлар, жиноятларни фош этиш ва тергов қилиш сифати ҳамда самарадорлигини ошириш юзасидан зарур кўрсатма ва тавсиялар берди.
Тадбир якунида ёш мутахассисларга қонунийлик, холислик ва адолат тамойилларига қатъий амал қилиш, инсон ҳуқуқ ва эркинликларига сўзсиз риоя этиш ҳамда билдирилган ишончни юксак масъулият билан оқлаш зарурлиги таъкидланди. Битирувчиларга келгуси хизмат фаолиятида муваффақиятлар тиланди.