Ҳуқуқни муҳофаза қилиш академиясида прокуратура органлари раҳбар кадрларини касбий қайта тайёрлаш курси якунланди. Тингловчилар якуний имтиҳондан ўтиб, касбий фаолиятнинг долзарб масалаларига бағишланган битирув малакавий ишларини ҳимоя қилди.
Ўқув дастури самарали бошқарув, ишни оқилона ташкил этиш, асосланган қарорлар қабул қилиш ва касбий вазифаларни тизимли ҳал этиш учун зарур компетенцияларни ривожлантиришга қаратилди. Таълим жараёни назарий тайёргарликни прокуратура органлари амалиёти билан узвий боғлаш асосида ташкил этилди.
Якуний босқичда тингловчиларнинг ўқув дастурини ўзлаштириш даражаси, назарий билимлари, амалий кўникмалари ҳамда раҳбарлик фаолияти учун зарур касбий компетенциялари комплекс баҳоланди. Битирув малакавий ишлари ҳимоясида касбий соҳадаги муаммоларни мустақил таҳлил қилиш, амалий ёндашувларни асослаш ва самарали ечимлар таклиф этиш қобилиятига алоҳида эътибор қаратилди.
Белгиланган талабларни муваффақиятли бажарган тингловчиларга касбий қайта тайёрлаш тўғрисидаги дипломлар тантанали равишда топширилди. Курсда эгалланган билим ва кўникмалар прокуратура органларида замонавий бошқарув ёндашувларини жорий этиш, раҳбарлик фаолияти самарадорлигини ошириш ва хизмат вазифаларини юксак масъулият билан бажаришга хизмат қилади.