Ҳуқуқни муҳофаза қилиш академиясида Ички ишлар вазирлиги ҳузуридаги Тергов департаменти тизимида терговчи сифатида фаолият бошлаётган ходимлар учун 288 соатлик касбий қайта тайёрлаш курслари изчил ташкил этилмоқда. Бугунга қадар дастурни 260 нафардан ортиқ ходим муваффақиятли тамомлади.
Курслар Ўзбекистон Республикаси Президентининг 2022 йил 28 ноябрдаги ПФ–257-сон Фармонида белгиланган тергов кадрларини узлуксиз тайёрлаш тизими доирасида йўлга қўйилган. Дастур ходимларни мустақил тергов олиб боришга тайёрлаш, замонавий тергов тактикаси ва методикасини амалиётда қўллаш кўникмаларини ривожлантиришга қаратилган.
Ўқув дастури жиноят ва жиноят-процессуал қонунчилигини қўллаш, далилларни тўплаш ва баҳолаш, тергов ҳаракатларини режалаштириш ва ўтказиш, рақамли технологиялардан фойдаланиш, инсон ҳуқуқ ва эркинликларини таъминлаш, касбий этика ҳамда хизмат интизоми масалаларини қамраб олади. Машғулотларга Академия профессор-ўқитувчилари билан бир қаторда кўп йиллик амалий тажрибага эга мутахассислар жалб этилмоқда.
Курс якунида тингловчилар якуний аттестациядан ўтади. Белгиланган талабларни муваффақиятли бажарган ходимларга касбий қайта тайёрлаш тўғрисидаги дипломлар топширилади. Айни пайтда Академияда навбатдаги ўқув гуруҳларининг машғулотлари давом этмоқда.
Терговчиларни тизимли тайёрлаш ички ишлар органларининг жиноятларни сифатли, холис ва инсон ҳуқуқларига қатъий риоя этган ҳолда тергов қилишга қодир кадрлар салоҳиятини мустаҳкамлашга хизмат қилади.