Ҳуқуқни муҳофаза қилиш академиясида электр энергияси ва газнинг техник ҳамда тижорат йўқотишларини таҳлил қилиш, улардан ноқонуний фойдаланиш ҳолатларини барвақт аниқлаш ва прогнозлашда сунъий интеллектни қўллашга бағишланган эксперт муҳокамаси ўтказилди.
"Электр энергияси ва газ йўқотишлари ҳамда улардан ноқонуний фойдаланиш ҳолатларини сунъий интеллект асосида таҳлил қилиш" мавзусида ўтказилган эксперт муҳокамасида техник ва тижорат йўқотишларининг сабаблари, уларни келтириб чиқараётган шарт-шароитлар ҳамда мавжуд назорат механизмларининг самарадорлиги таҳлил қилинди.
Мутахассислар соҳадаги ахборот тизимлари, электр энергияси ва газни ҳисобга олиш механизмлари, мавжуд маълумотларни рақамли қайта ишлаш ҳамда йўқотишларни аниқлаш амалиёти юзасидан фикр алмашдилар. Рақамлаштириш жараёнларини такомиллаштириш ва замонавий ахборот технологияларини амалиётга самарали жорий этиш имкониятларига алоҳида эътибор қаратилди.
Шунингдек, сунъий интеллект ёрдамида энергия ресурсларидан ноқонуний фойдаланиш ҳолатларини барвақт аниқлаш ва прогноз қилиш механизмларини ишлаб чиқиш, назорат ҳамда ҳисобга олиш тизимларининг самарадорлигини ошириш масалалари кўриб чиқилди.
Эксперт муҳокамаси натижалари энергия ресурслари йўқотишларини камайтириш, ноқонуний фойдаланиш ва талон-торож ҳолатларининг олдини олиш, шунингдек, соҳага сунъий интеллект технологияларини жорий этиш бўйича амалий таклиф ва тавсиялар ишлаб чиқишга асос бўлади.