Сурхондарё вилоятида Академияга бириктирилган, айниқса, “қизил” тоифага киритилган маҳаллаларда Ўзбекистон Республикаси Ҳуқуқни муҳофаза қилиш академияси ишчи гуруҳи томонидан криминоген вазият комплекс ўрганилмоқда. Ишлар “илмий хулоса – тавсия – натижа” тамойили асосида ташкил этилган.
Асосий мақсад – ҳуқуқбузарлик содир этилгандан кейин чора кўриш билан чекланмай, муаммоларнинг туб сабабларини бевосита маҳаллий ижтимоий муҳитда аниқлаш ва бартараф этишдан иборат.
Тадқиқот доирасида ҳар бир маҳалланинг криминологик харитаси ва хавф профиллари шакллантирилиб, низоли оилалар, банд бўлмаган ёшлар ҳамда ижтимоий мослашувга муҳтож шахслар билан боғлиқ хавф омиллари чуқур таҳлил қилинди.
Профилактика инспекторлари ва “маҳалла еттилиги” вакиллари учун реал кейсларга асосланган илмий-услубий тренинглар ташкил этилган. Машғулотларда низоларни медиация орқали ҳал этиш ва тажовузкор кайфиятни жиловлаш масалалари кўриб чиқилмоқда. Натижада тайёр қолиплардан воз кечилиб, муайян хонадон ёки кўчадаги реал шароитга мослаштирилган ижтимоий, ҳуқуқий ва психологик кўмак кўрсатишнинг экспресс-алгоритмлари амалиётга жорий этилмоқда.
Академия ишчи гуруҳи томонидан тўпланган эмпирик маълумотлар Сурхондарё вилоятида криминоген вазиятни барқарорлаштириш бўйича махсус тавсиялар ишлаб чиқиш, шунингдек, республика миқёсида қўллаш мумкин бўлган ҳуқуқбузарликлар профилактикаси методикасини такомиллаштириш учун асос бўлиб хизмат қилади.