Мазкур ҳужжат Ўзбекистон Республикаси Ҳуқуқни муҳофаза қилиш академияси ва Ўзбекистон Республикаси Олий суди ўртасида суд-ҳуқуқ соҳасида узоқ муддатли, самарали ва ўзаро манфаатли ҳамкорликни ривожлантириш, суд амалиёти, илм-фан ва таълим ўртасидаги интеграцияни янада мустаҳкамлашга қаратилган.
Меморандум доирасида ўтказилган давра суҳбатида томонлар ҳамкорликнинг устувор ва амалий йўналишларини муҳокама қилди. Хусусан, экспертлар ва малакали мутахассислар иштирокида қўшма илмий-тадқиқот лойиҳалари, ўқув ҳамда амалий тадбирларни ташкил этиш, қонун ижодкорлиги ва ҳуқуқни қўллаш амалиётини чуқур таҳлил қилиш масалалари кўриб чиқилди.
Шунингдек, суд амалиётидаги долзарб масалалар бўйича илмий-амалий тадқиқотларни ривожлантириш ҳамда уларни суд амалиётига оид зарур материаллар ва ахборот билан таъминлашга алоҳида эътибор қаратилди.
Учрашув якунида Академия ва Олий суд ўртасида илм-фан, таълим ва рақамлаштириш соҳаларидаги ҳамкорликни аниқ чора-тадбирлар асосида изчил амалга ошириш мақсадида алоҳида “йўл харитаси”ни ишлаб чиқиш бўйича келишувга эришилди.
“Йўл харитаси”да қўшма илмий тадқиқотлар ўтказиш, суд амалиёти натижаларини таълим жараёнига кенг жорий этиш, судьялар ва суд аппарати ходимларининг малакасини оширишга қаратилган таълим лойиҳаларини амалга ошириш, шунингдек, суд-ҳуқуқ соҳасида рақамли технологиялар ва замонавий ахборот ечимларидан фойдаланиш бўйича ҳамкорлик чораларини белгилаш назарда тутилади.
Меморандум ва уни амалга оширишга қаратилган келгуси чора-тадбирлар суд амалиёти, илм-фан ва таълим ўртасидаги узвий боғлиқликни кучайтириш, илмий натижаларнинг амалий аҳамиятини ошириш, кадрлар тайёрлаш сифатини юксалтириш ҳамда суд тизимидаги рақамлаштириш жараёнларини илмий ва услубий жиҳатдан қўллаб-қувватлашга хизмат қилади.