11 сентябрь куни Ўзбекистон Республикаси Ҳуқуқни муҳофаза қилиш академиясида инглиз тилини, хусусан, юридик инглиз тилини ўрганишга қизиқувчи профессор-ўқитувчилар, талабалар ва соҳа мутахассислари иштирокида юридик соҳада инглиз тилидан фойдаланишга бағишланган тадбир бўлиб ўтди.
Очиқ маҳорат дарси Академияда офлайн ҳамда Zoom платформаси орқали онлайн шаклда ташкил этилди. Унда Академия талабалари билан бир қаторда республиканинг турли ташкилот ва муассасалари мутахассислари, инглиз тили ўқитувчилари ҳамда юридик инглиз тилини ўрганувчилар иштирок этди.
Маҳорат дарсига халқаро ҳуқуқ соҳаси мутахассиси, IELTS имтиҳонидан 9,0 балл олган ва CELTA сертификати соҳиби Жаҳонгир Эсанов махсус меҳмон ва маърузачи сифатида таклиф этилди.
Машғулот давомида юридик соҳада инглиз тилидан самарали фойдаланиш, ҳуқуқий терминологияни тўғри қўллаш, касбий мулоқот кўникмаларини ривожлантириш ҳамда халқаро ҳуқуқий муҳитда инглиз тилининг аҳамияти масалалари кўриб чиқилди.